Ես չեմ բացառում, որ Ադրբեջանը լայնամասշտաբ հարձակման կգնա․ իրենց նպատակը Հայաստանն արևմտյան Ադրբեջանի վերածելն է
Նիկոլ Փաշինյանը վերջերս այց էր կատարել սահմանամերձ գոտի, որտեղ պատրաստվում են այդ տարածքները հանձնել և ահաբեկել է ժողովրդին պատերազմով։ Բա եթե պարզապես հիստերիկ կրակում են, որևէ վտանգ չկա, ուրեմն պետք չի նաև ժողովրդին վախեցնել։ Այս մասին այսօր Ազգային ժողովում լրագրողների հետ զրույցում ասաց ԱԺ Հայաստան խմբակցության պատգամավոր Արմեն Ռուստամյանը։
«Իրականում այդպես չէ։ Իրականում շատ հստակ ծրագրավորված գործընթաց է, որը բազմիցս փորձարկվել է և տվել է իր արդյունքները, քանի այս իշխանությունները ղեկավարում են մեր երկիրը, այնտեղից վախեցնում են, այստեղից վախեցնում են, և ստեղծում են տպավորություն, որ մենք ուրիշ ճանապարհ չունենք, պիտի զիջենք, որպեսզի կարողանանք գոյատևել այս տարածքներում և իրենց ծրագիրը՝ կտոր-կտոր հանձնելու և Ադրբեջանի պահանջները բավարարելու ընթացքով, ամբողջությամբ դրված է գործողության մեջ»,- ասաց Ռուստամյանը։
Նրա խոսքով՝ իշխանությունների բանավոր խոսկցությունները զուգորդվում են սահմանային լարվածություններով, որպեսզի Ադրբեջանն ու Թուրքիան ստանան իրենց համար ընդունելի արդյունքներ և անընդհատ զիջումներով հասնեն իրենց նպատակին։
Հարցին, թե կրակոցների լուծելիք խնդիրն արդյոք միայն Տավուշի 4 գյուղերն են, թե ավելի հեռուն գնացող, Ռուստամյանն ասաց, որ իհարկե ավելի հեռուն գնացող են խնդիրները․
«Իրենք երբեք էլ կանգ չեն առել որևէ պահանջի վրա։ Ժամանակին անկեղծության պոռթկում ունենալով՝ Նիկոլ Փաշինյանն ինքն է դա հաստատել՝ ասելով, որ մենք պատրաստ ենք զիջել, բայց չգիտենք՝ մինչև ինչքան զիջենք, որ իրենց բավարարենք։ Ես գիտեմ՝ մինչև ինչքան պետք է զիջել, որ իրենց բավարարել՝ մինչև հայկական ինքնության վերացումը, հայկական գործոնի վերածումը և Հայաստանի վերածումն արևմտյան Ադրբեջանի։ Այս ընթացքն իրականացվում է այս ահաբեկչական մթնոլորտը ստեղծելով մեր շուրջ, մենք էլ մյուս կողմից ասում ենք՝ թույլ ենք, անկարող ենք, ամենաբարենպաստ պայմաններն են ստեղծվում»,- նկատեց պատգամավորը։
Նա չբացառեց, որ Ադրբեջանն այս անգամ լայնամասշտաբ հարձակման կգնա, որ միանգամից խնդիրը լուծի։
«Լոկալ բախումների ընթացքով հասել է ինչ-որ լոկալ արդյունքի, բայց այս անգամ կարծում եմ՝ իրենց նպատակը շատ ավելի գլոբալ է և այդ գլոբալ խնդիրը լուծելու համար մենք ինքներս պատերազմով այդ հարցը լուծելու պարարտ հող ենք ստեղծել, երբ որ մենք ասում ենք, որ այդ տարածքներն իրենցն են, արդեն հրավիրում ենք, որ այդ տարածքներ մտնեն ցանկացած եղանակով, այդ թվում՝ զորքով»,- շեշտեց Ռուստամյանը։