Էդգար Ղազարյանը մեջբերեց «21-րդ դարի խոշորագույն դիվանագետ» Նիկոլ Փաշինյանի խոսքը` կոշիկ լիզելու մասին. դահլիճից արձագանքեցին` «բրավո» (տեսանյութ)
Հայաստանի Հանրապետության արտակարգ դեսպանորդ և լիազոր նախարար Էդգար Ղազարյանն Ազգային ժողովում «Հայաստանի եվրաինտեգրման նոր հեռանկարները և մարտահրավերները» թեմայով խորհրդարանական լսումների ժամանակ իր խոսքի վերջում հիշեցրեց Նիկոլ Փաշինյանի` 2020 թվականի մարտի 12-ին Վայք քաղաքում արված մի հայտարարություն այն մասին, թե նախկինում դիվանագիտությունն իրենից ենթադրել է այլ պետությունների «կոշիկները լիզել»:
Ղազարյանը Նիկոլ Փաշինյանի անունը չտվեց, նշելով, որ միայն հղում է անում «21-րդ դարի խոշորագույն դիվանագետներից մեկի արտաբերած մտքերից»:
Խոսքը, մասնավորապես, Փաշինյանի հետևյալ հայտարարության մասին էր. «Ձեր դիվանագիտությունը ի՞նչ է եղել. ինչքան օտար անձնագրով մարդ եք տեսել, կոշիկները լիզել եք, ձեզ էլ թվացել է, թե դա է դիվանագիտությունը, այ ինքնասերներ: Ողբերգությունն էն է, որ դուք բոլորի կոշիկները լիզել եք մեր անունից: Բայց մենք կոշիկ լիզող չենք, դուք եք կոշիկ լիզողը: Դուք լիզել եք ու լիզելու եք։ Այսօր էլ եք վազում եվրոպաներում, մոսկվաներում ինչքան կոշիկ եք տեսնում, լիզում եք: Այ տենց էլ մինչեւ ձեր կյանքի վերջ լիզելու եք սրա-նրա կոշիկները, այ կոշիկ լիզողներ»:
Ղազարյանի ելույթի ավարտին դահլիճից ինչ-որ մեկը արձագանքեց` «բրավո»: