Ես չեմ ասում կոռուպցիոն գործողություններ չեն եղել, բայց այս պահին ներկայացված մեղադրանքները փաստեր չունեն․ Վահան Քերոբյան

ՀՀ էկոնոմիկայի նախարար Վահան Քերոբյանը փոխնախարարի ձերբակալության գործով ներգրրաված չէ և նրան հարցաքննության չեն հրավիրել։ Այս մասին Քերոբյանն ասել է Հանրային հեռուստաընկերության եթերում։

Մեկնաբանելով տեղի ունեցածը՝ նա ասել է․

«Ես 100 տոկոսով չեմ կարող խոսել որևէ անձի մասին, բացի ինձնից, բայց այս պահին եղած մեղադրանքը և իմ գիտելիքները թույլ են տալիս ասել, որ մեր գործողություններում ոչ մի անօրինականություն չկա։ Մենք բացառապես օրենքի տառին համաձայն ենք շարժվել։ Ինձ համար մարդը մեղավոր է, երբ իր նկատմամբ մեղադրական ակտ կա»,- ասել է նա

Էկոնոմիկայի նախարարը չի պնդում, որ կոռուպցիոն գործողություններ չեն եղել, բայց միևնույն ժամանակ նշում է, որ այս պահին ներկայացված մեղադրանքները փաստեր չունեն։

«Ասում են` առերևույթ կոռուպցիա, բայց չեն ասում` դրա բնույթը ինչպիսին է։ Այսինքն` կաշառք կա, թե չկա` կոնկրետ չեն ասում։ Ընդ որում` առաջին դրվագով, որը վերաբերում է Անի Իսպիրանյին, ընդհանրապես բյուջեի միջոցներ չեն ծախսվել։ Այսինքն` թե ինչ վնաս է հասցվել պետությանը, ինչպիսի սխալ փաստեր են կատարվել, ով ա դրա համար կաշառք վերցրել... ոչ մի նմանատիպ փաստ չկա ու չի էլ կարող լինել»,– ասել է նա։

Նախարարը տեղեկացրել է նաև, որ ներքին քննություն էկոնոմիկայի նախարարությունում այս պահին չի իրականացվում։ Քերոբյանի կարծիքով` դա իրավապահ մարմինների գործն է։

«Վարչապետը մեզ մի քանի անգամ ասել է, որ կոռուպցիոն երևույթները, որոնք կան գերատեսչություններում, ի վերջո գերատեսչության ղեկավարի պատասխանատվությունն են, և ես դրա վերաբերյալ բնականաբար իմ կարծիքը և որոշումը կասեմ վարչապետին, կստանձնեմ դրա պատասխանատվությունը»,- նշել է նախարարը։