Կարելի էր չէ՞, ուղեղով մտածել. գյումրեցի երեխաների ձեռքին ծածանվել են Թուրքիայի դրոշի լոգոտիպով դրոշակներ (լուսանկարներ)
Հունիսի մեկին՝ երեխաների պաշտպանության օրվա առիթով Գյումրիում կազմակերպված միջոցառման ժամանակ երեխաների ձեռքին ծածանվել են Թուրքիայի դրոշի լոգոտիպով դրոշներ:
«Գյումրու Պիոներների պալատ»-ի 100-ամյակի կապակցությամբ պատրաստվել են կարմիր դրոշներ, որոնց վրա պատկերված նկարը հիշեցնում է Թուրքիայի դրոշի վրա նկարված լուսինն ու աստղը:
Հենց այս լոգոտիպով դրոշակներն էլ ձեռքներին, Վարդանանց հրապարակ շքերթով մուտք գործեցին Պիոներների պալատի խմբերը՝ «Անի» փողային նվագախմբի նվագակցությամբ:
Միջոցառմանը ներկա էին քաղաքային իշխանության ներկայացուցիչներ՝ Գյումրի համայնքի ղեկավար Վարդգես Սամսոնյանի գլխավորությամբ:
Թե ինչու է այս միջոցառման համար ընտրվել հենց այս լոգոտիպը, Գյումրիի քաղաքապետարանի մշակույթի և երիտասարդության հարցերի պետ Լիլիթ Թովմասյանը ասել է, թե դա ընդամենը ծառ է․
«Արմատներով ու նոր շիվերով շրջանը դարի պտույտն է բոլորապտույտ՝ ի նշան 100-ամյակի»,-ասել է նա:
Պատահականությո՞ւն է, զուգադիպությո՞ւն, թե՞ դիտավորություն՝ այս մասին համացանցում տարաբնույթ ու բազմազան քննարկումներ եղան:
Հենց համայնքապետարանի ֆեյսբուքյան էջում օգտատերերը բացասական արձագանքներ են թողել.
Հատկանշական է, որ մեկնաբանությունների մեծ մասը ջնջվել է էջից, ինչը տրամաբանական էր: Անտրամաբանականն այն է, թե ինչո՞ւ էին քաղաքային իշխանությունները թույլ տվել նման բացթողում՝ հարվածի տակ դնելով գյումրեցիների երեխաներին, քաղաքի պատիվն ու երկրի նկարագիրը:
Այստեղ մեղավորը ոչ թե այդ դրոշները բռնող երեխաներն են, ովքեր փաստորեն անմիջական հարվածի տակ ընկան, այլ հենց քաղաքի պարագլուխը, ով հավանաբար տառապում է «նիկոլացավով» ու փորձում է հաճոյանալ իր թրքասեր ղեկավարին:
Իրականում նողկալի տեսարան էր՝ երեխաները Թուրքիայի դրոշի լոգոտիպով դրոշակները ծածանելով, ուրախ ու զվարթ անցնում են հրապարակով, իսկ այդ դրոշը ծածանողներին երկու կողմից ծափահարում են ու ողջունում:
Նորից կրկնեմ, երեխաները մեղավոր չեն, բայց տպավորությունն այնպիսին էր, որ այս միջոցառումը կազմակերպված էր ոչ թե Հայաստանի քաղաքներից մեկում, այլ Թուրքիայում: Իսկ այդ տհաճ տեսարանի թիվ մեկ մեղավորն ու պատասխանատուն Գյումրիի քաղաքապետն է:
Կարելի էր չէ՞, ուղեղով ու մի քիչ երկար մտածել...
Արմինե Մկրտումյան