Ընդունում եմ քննադատությունը, որ էմոցիոնալ եմ գտնվել. Մուշեղ Շուշանյան

Ընդունում եմ քննադատությունը, որ էմոցիոնալ եմ գտնվել և չարժեր արձագանքել, որ պետք էր ընդամենը հայհոյանք տվողին բլոկել․․․։ Այդ մասին ֆեյսբուքյան իր էջում գրել է փաստաբան Մուշեղ Շուշանյանը՝ անդրադառնալով ավելի վաղ արված գրառմանը։

«Միգուցե սադրանքի եմ տրվել։ Բայց այդ ամենով հանդերձ կուզենամ հետևյալը ասել՝ ձևավորվել է ու գոյություն ունի մի շերտ, որը հանձն է առել պաշտպանելու Նիկոլ Փաշինյանի ցանկացած որոշում ու նախաձեռնություն, հիմնվելով այն մոտեցման վրա, որ Նիկոլը միշտ ճիշտ է և նրա որոշումներն ու քայլերը քննարկման ենթակա չեն։ Անցյալ տարվա ապրիլ-մայիսյան համազգային զարթոնքի ժամանակ գիտակից/իրավագիտակից քաղաքացի կրթելու բացառիկ հնարավորություն էր ստեղծվել, սակայն այդ հնարավորությունը ոչ միայն չօգտագործվեց, այլև արվեցին ճիշտ հակառակ քայլեր՝ Նիկոլի անձի պաշտամունք ձևավորելու, նրան անվերապահորեն հավատացողների «բանակ» ստեղծելու ուղղությամբ։ Վարչապետապաշտների այդ շարքերը ստանձնեցին Նիկոլին «պաշտպանելու» գործառույթ։ Նիկոլի որևէ որոշման հանդեպ կասկածը դիտվում է որպես թշնամության դրսևորում և քննադատողները հաճախ ոչ միայն պախարակվում են որպես նախկին ռեժիմի սպասավորներ, այլև ենթարկվում են անհատական գրոհների։

Հեռու եմ այն մտքից, որ այս ամենը կատարվում է առանց Նիկոլի գիտության ու հավանության»,- գրել է փաստաբանը։