29-ամյա ծննդկանն ու նորածինը մահացել են. բժիշկները «փախած են». հարազատներին չի հաջողվում ոչ նրանց տեսնել, ոչ էլ` մահացած կնոջը

Արարատի մարզի Վեդի քաղաքում ողբերգական դեպք է տեղի ունեցել: 29-ամյա ծննդկան Քնարիկ Մանուկյանը և նորածին երեխան մահացել են: Սա կնոջ 2-րդ ծննդաբերությունն էր:

NEWSPRESS.am-ի տեղեկություններով, ծննդկանին Վեդիի ծննդատուն են տարել երեկ՝ օգոստոսի 1–ին: Այսօր առավոտյան ժամը 8:00-ի մոտակայքում հարազատները տեղեկացել են, որ Քնարիկը մահացել է: Թե ինչու և ինչպես է վրա հասել մահը` հարազատներին չի հաջողվել պարզել, քանի որ դեպքի վայրում նրանք չեն կարողացել հանդիպել ո'չ մանկաբարձին, ո'չ գլխավոր բժշկին:

Նկատենք նաև, որ տեղում աշխատում են ոստիկաններ: Դեպքի առնչությամբ նշանակվել է դատաբժշկական փորձաքննություն, հանգամանքները պարզվում են։

NEWSPRESS.am-ի հետ զրույցում ծննդկանի հարազատներն ասացին, որ Քնարիկը իր ոտքով հանգիստ գնացել է ծննդատուն ու մինչ այդ էլ, հղիության ընթացքում, խնդիրներ չեն ծագել:

Հիվանդանոցից հարազատներին բժշկի համար չեն տրամադրել, ու թեև նրանց հաջողվել է ձեռք բերել այն, սակայն բժիշկը հեռախոսազանգերին չի պատասխանում:

Ու քանի որ հարազատներին մինչ այս պահը ո'չ թույլ են տվել բարձրանալ Քնարիկի մոտ, ո'չ էլ թույլ են տալիս տանել նրա մարմինը, վերջիններս ցանկանում են գոնե տեղեկատվություն ստանալ բժիշկներից, ինչը նրանց չի տրամադրվում:

Ցանկանում ենք առողջապահության նախարարության ուշադրությունը հրավիրել կատարվածին, ու մահացած կնոջ հարազատներին տրամադրել պատշաճ տեղեկատվություն այն մասին, թե ինչպես պատահեց, որ առողջ կինը մի քանի ժամվա ընթացքում խնդիրներ ունեցավ և մահացավ նորածնի հետ: