Հայկո, փախիր, քանի կարող ես, թե չէ քաղաքի չորացած ծաղիկներն ու աղբը քեզ կնվիրեմ
Գուցե քաղաքապետ Հայկ Մարությանը կարծի, թե կոնկրետ նպատակ եմ հետապնդում իրեն սևացնելու` վարկաբեկող գրառումներ կատարելով, բայց ասում եմ այն, ինչ կա... Մարությանը ստիպված պետք է լինի բաց աչքերով նայել դառը իրականությանն ու առճակատ լսել իր մասին այն, ինչ նրա հետևից ասում են բազմաթիվ երևանցիներ. հավատացնում եմ, որ ես ավելի մեղմ եմ արտահայտվում, քան իրականում մարդիկ խոսում են իր մասին: Խոսում են, քանի որ ոչ մի իրեն հարգող երևանցի չի կարող հանգիստ խղճով նայել այն աղբին ու հրդեհներին, որոնք առկա են:
Որքան ուզում եմ փորփրել, հիշել` չեմ կարողանում մտաբերել, որ նախկինում Երևանն այսչափ կեղտոտ եղած լինի: Իհարկե դարձյալ կային աղբահանության հետ կապված խնդիրներ, բայց ոչ այնպես, ինչպես որ այսօր է. գարշահոտություն, առնետներ, ճանճեր, հրապարակում վխտացող խավարասերներ... մի խոսքով, այն ամենը, ինչը կարող է վարակիչ հիվանդությունների պատճառ դառնալ ու իր հետ բերել բազում խնդիրներ:
Մի ժամանակ, երևի ամբողջ Երևանում միայն մի քանի մարդ հազիվ գտնվեր, ով կասեր, որ որպես արտիստ Հայկ Մարությանին չի հավանում: Այսօր արդեն իրավիճակ է փոխվել. հազիվ գտնվի մի քանի մարդ, որ կասի, թե Հայկը լավն է, լավ քաղաքապետ է: Այստեղ արդեն Մարությանի «ես լավ տղա եմ» հայտնի տեսահոլովակն էլ չի օգնի. «լավ տղայից» բան չի մնացել, քանի որ նա չինովնիկ է դարձել:
Հայկի քաղաքապետի կեղծ կերպարը զրո դարձրեց այն հարգանքը, որ կար երբևէ իր նկատմամբ: Շատերի համար Հայկը մնաց որպես դերասան, իսկ շատերի համար` չստացված ու անհաջող քաղաքապետ:
Փոխանակ ավելի շենացնելու և գեղեցկացնելու քաղաքը` նա եղածն էլ ոչնչացնում է. դրա ապացույցը թեկուզև մայրաքաղաքի այգիների չորացած ծառերն ու ծաղիկներն են:
Ամեն օր մի նոր խոտածածկ տարածքի հրդեհի մասին ենք լսում, ականատես լինում. քո նպատակը Երևանն ամբողջովին այրե՞լն է, ինչո՞ւ չեն ջրվում ու խոնավեցվում այդ տարածքները:
Մի հարցնող լինի` Հայկ ջան, դուրս եկե՞լ ես փողոց, տեսե՞լ ես` ի՞նչ է կատարվում բանուկ հատվածների ծաղկային հատվածներում՝ անմշակ խոտածածկ տարացքները չորացել են: Դրանք ջրել էր հարկավոր` ամենօրյա ռեժիմով:
Իսկ եթե դուրս ես եկել, տեղյակ ես, թե ինչ է կատարվում, ու գործ չես արել, ուրեմն դա ավելի վատ է...
Հիշո՞ւմ ես` քո և բոլոր քայլարածների կողմից չընդունված Տարոն Մարգարյանի օրոք ինչ ծաղկանոց էր Երևանը: Խոստովանի գոնե ինքդ քեզ, որ իսկապես գեղեցիկ էր քաղաքն ու մաքուր: Հիմա ի՞նչ է կատարվում Երևանում: Ժողովրդին խաբեցիր ու քեզ ընտրել տվեցիր: Ասում եմ` խաբեցիր, քանի որ մարդիկ քեզ չեն ընտրել, նրանք հեղափոխությունն են ընտրել: Երևի մտածում էին, թե ավելի լավ է լինելու` զոմբիացել էին: Հիմա կամաց-կամաց ուշքի են գալիս, բայց ուշ է. քաղաքի վիճակը գնալով ավելի է վատանում:
Ասում եք` քաղաքապետարանում մինչև ուշ ժամ աշխատում են. ախր, քաղաքապետարանի կաբինետում նստած ի՞նչ են աշխատում, որ մի հատ էլ դրա համար պարգևավճարներ են ստանում: Պաթետիկ հարցազրույցներ եք տալիս` չարած գործերը որպես արդեն կատարված ներկայացնելով: Հո' միայն խոսելով չի՞, գո'րծ արեք, գո'րծ... թե չէ ինչի՞, կո՞ւյր ենք ինչ է, չե՞նք տեսնում, որ քաղաքը չորանում է ու գործ չեք անում:
Բեմի վրա գոնե ծափողջույներն էիր ստանում, քեզ հարգում էին, ծաղիկ էին բերում... Հիմա, որ քաղաքի չորացած ծաղիկները քեզ նվեր բերեմ, ոստիկանությո՞ւն ես կանչելու ու քրեկան գործ ես հարուցել տալու իմ նկատմամբ:
Բայց միայն մեր հարցը չէ. քաղաքը զրոյանում է նաև որպես տուրիստական երկիր, քանի որ ախտոտված է` աղբի մեջ կորած:
Ժողովրդին սև ու սպիտակի բաժանելով ու ժողովրդի մեջ մթնոլորտն աղտոտելուց բացի, ուղիղ իմաստով քաղաքն էլ աղբանոց դարձրիր:
Վազեցիր, փակեցիր, պայքարեցիր միայն հանուն աթոռի՞. քեզ թվում էր հե՞շտ է կառավարումը. որ մի դրական դինամիկա, ոչ մի դրական փոփոխություն ձեր իշխանության գալուց հետո:
Միայն հերթական պարգևավճարի սպասող պորտաբույծներ եմ տեսնում` ուրիշ ոչինչ:
Մենք հիմա պետք է ուրախանայինք ո'չ թե աղբամաններն ավելացնելու համար, այլ այդ աղբամաններն օրվա մեջ դատարկելու համար. ավելացված աղբամանը հարցի լուծում չէ... Ամո'թ է, սա ձեր խայտառակությունն է:
Ու մի բան էլ. լուրեր կան, թե ուզում ես հրաժարական տալ, բայց Փաշինյանին ես լսում, ու չես տալիս: Մի լսիր, հրաժարական տուր քաղաքապետի պաշտոնից ու որքան ուժ ունես ոտքերիդ մեջ` փախիր քաղաքապետարանից, քանի դեռ ժողովուրդն իր ձեռքով քեզ գահընկեց չի արել:
Մարդիկ գուցե հարգեն քո այդ որոշումն ու մտածեն, որ շատ էիր սիրում Երևանը, բայց պարզապես չկարողացար ոչինչ անել ու բաց ճակատով, հոժարակամ զիջեցիր աթոռը նրան, ով կարող է...
Աղբի ու հրդեհների մեջ Երևանը չի կարող երկար դիմադրել, երևանցիների համբերության բաժակը լցնում ես...
Արիանա Հովսեփյան
NEWSPRESS.am-ի հիմնադիր-տնօրեն