Դատարանի դիմումը ՍԴ վարույթ ընդունվելուց հետո Ռոբերտ Քոչարյանը պետք է անհապաղ ազատ արձակվեր. Արամ Վարդևանյան
«Որտե՞ղ է ամրագրված, որ պետք է ՍԴ-ն սպասեր բացատրությունների տրամադրմանը, որից հետո դիմեր Վենետիկի հանձնաժողով և ՄԻԵԴ»: Այս մասին լրագրողների հետ հանդիպմանն ասաց սահմանադրագետ Արամ Վարդևանյանը` անդրադառնալով ՀՀ երկրորդ նախագահ Ռոբերտ Քոչարյանի գործով դիմումը Մարդու իրավունքների եվրոպական դատարանին և Վենետիկի հանձնաժողովին ներկայացնելուն:
Նա նկատեց, որ հայաստանյան պրակտիկայում երևույթը հնարավոր է նորարարություն է, բայց միջազգային պրակտիկայում՝ ոչ:
«Սա հավելյալ արդյունավետ գործիք է։ Տարակուսելի և անհասկանալի է քննադատությունը կամ դիսկուրսը որ ձևավորվում է այս գործընթացի վերաբերյալ»,-ասաց նա:
Արամ Վարդևանյանը նաև նշեց, որ կալանավորումը որպես խափանման միջոց ընտրելը` իրավունքի խախտում է և խափանման միջոցը պետք է փոխել:
«Երբ հուլիսի 8-ին դատարանի դիմումը վարույթ ընդունվեց Սահմանադրական դատարանի կողմից, անձը կալանավորված չի կարող լինել, մեկ պարզ պատճառով, կալանավորումը կիրառելու համար պետք է լինի հիմնավոր կասկած և կալանավորման պայմանները: Հիմնավոր կասկածի առանցքը հանդիսանում է քրեական օրենսգրքի հոդվածը, որը սահմանադրականության խնդիր ունի և այն որ Սահմանադրական դատարանը վարույթ է ընդունել դատարանի դիմումը, իսկ բովանդակությունը վկայում է նրա մասին, որ 300.1 հոդվածը խնդիր ունի, այս պարագայում կալանավորումն առհասարակ չի կարող կիրառվել»,-ասաց նա:
Սահմանադրագետը նաև հացադրում արել, թե ի՞նչ են անելու այս տևական կալանավորման համար, երբ ՄԻԵԴ-ից կա խորհրդատվական կարծիք, որ նշված նորմով չի կարելի քրեական հետապնդում իրականացնել: Նա չի հասկանում, թե ինչով է պայմանավորված համապատասխան նիստի կազմակերպումը, որտեղ պետք է լուծվեր հարցը:
«Պետք է անհապաղ նիստ գումարվի, անկախ ցանկացած հանգամանքից: Եթե մենք եվրոպական երկրում լինեինք՝ գիշերը նիստ կգումարվեր, երբ Սահմանադրական դատարանը վարույթ էր ընդունել, ինչը նշանակում է հիմնավոր կասկածի դադարեցում, իսկ դա նշանակում է անհապաղ ազատ արձակել»: