Պարոն Յոլյանին պաշտոնապես հրավիրում եմ հանրային քննարկման կամ հեռուստաբանավեճի. Արամ Մամիկոնյան
ՀՀ հաշվեքննիչ պալատի Իրավաբանական վարչության պետ Արամ Մամիկոնյանն իր ֆեյսբուքյան էջում գրել է.
«Այսօր Հաշվեքննիչ պալատի նախագահ Լևոն Յոլյանն իր մամուլի ասուլիսի ընթացքում քանիցս անդրադարձել է ինձ, ինչի կապակցությամբ ցանկանում եմ հպանցիկ պատասխանել իր կողմից բարձրացված մի քանի հարցերի... Հարգելի պարոն Յոլյան.
1. Ձեր այն պնդումը, որ ես որևէ բողոք կամ խնդիր եմ բարձրացրել www. armdaily. am լրատվականին չի համապատասխանում իրականությանը, քանզի ես այդ լրատվամիջոցի հետ երբևէ չեմ առնչվել:
2. Այն, որ պարգևատրումների ժամանակ Ձեր որոշումը պրակտիկորեն չի տարբերվում պալատի անդամի առաջարկությունից նույնպես չի համապատասխանում իրականությանը, քանզի ինձ, օրինակ, Դուք կամայական չեք պարգևատրել՝անտեսելով Իրավաբանական վարչության աշխատանքները համակարգող Հաշվեքննիչ պալատի անդամի գրավոր առաջարկությունը:
3. Ձեր այն կարծիքը, որ Հաշվեքննիչ պալատում առկա բազում իրավական խնդիրների լուծման կապակցությամբ որևէ բան չի արվում չի համապատասխանում իրականությանը, քանզի Հաշվեքննիչ պալատի Իրավաբանական վարչությունն իմ ղեկավարությամբ տարիներ շարունակ կատարել և կատարում է պալատի իրավական ապահովմանն ուղղված ամենօրյա մեծածավալ աշխատանք, ինչը ներկայացվել է Ձեզ նաև համապատասխան զեկուցագրերով:
4. ՀՀ Պետական վերահսկողական ծառայություն ես, որպես իրավաբան, ինչպես Դուք շատ ճիշտ նշեցիք, դիմել եմ՝ հիմք ընդունելով «Պետական վերահսկողական ծառայության» մասին ՀՀ օրենքով պետական բյուջեի միջոցների օգտագործման նկատմամբ վերահսկողություն իրականացնելու մասով առկա իրավակարգավորումները:
5. Ձեր այն տեսակետը, որ Հաշվեքննիչ պալատում պարգևատրումները կատարվում են պալատի կոլեգիալ մարմնի
կողմից ընդունված Կարգին համապատասխան նույնպես չի համապատասխանում իրականությանը, քանզի իմ դեպքում Ձեր կողմից կոպտորեն խախտվել են Կարգի պահանջներն ու չափորոշիչները և այլն…
Հ.գ. միաժամանակ, օգտվելով առիթից, հարցի առնչությամբ հասարակության մոտ հետագա տարակարծություններն ու տարըմբռնումները բացառելու նպատակով, սույնով պարոն Յոլյանին պաշտոնապես հրավիրում եմ հանրային քննարկման կամ հեռուստաբանավեճի՝ նշված հարցի մանրամասները, ինչպես նաև ՀՀ Սահմանադրությամբ և «Հաշվեքննիչ պալատի մասին» ՀՀ օրենքով Հաշվեքննիչ պալատի առջև ծառացած նոր իրավական մոտեցումները քննարկելու համար:
Ակնկալում եմ զանգվածային լրատվական միջոցների օգնությունն ու աջակցությունը…»: