«Իրավունք». Աժ-ում ախպերներով սելֆիախառն «հնդկական կինո» են նկարել

«Իրավունք» թերթը գրում է.

«Մամուլում եւ քաղաքական կուլիսներում լայնորեն քննարկվում է, որ իշխող «Քաղաքացիական պայմանագիր» կուսակցության վարչության կազմում կուսակցության կարկառուն անդամներից «Իմ քայլը» խմբակցության պատգամավոր Հայկ Սարգսյանի չհայտնվելը պայմանավորված է վարչապետ Նիկոլ Փաշինյանի զայրույթով:

Ավելին՝ ըստ նույն աղբյուրների, Ն. Փաշինյանը ՔՊ համաժողովին նախորդած վարչության նիստի ժամանակ ասել է. «Էդ ի՞նչ ձեւ է ընդհանրապես իրեն պահում, ասեք դրան՝ աչքիս չերեւա»:

Թվում էր, թե այսքանից հետո Հ. Սարգսյանը, գոնե որոշ ժամանակ, կխուսանավի աչքի ընկնել այս կամ այն պատմությամբ, բայց արի ու տես, որ՝ ոչ:

Այս շաբաթ Ազգային ժողովում կառավարության հետ հարցուպատասխանի ժամանակ Հայկ Սարգսյանը որոշեց ոչ թե Ն. Փաշինյանի աչքին երեւալ, այլ թիկունքի հետեւում «հնդկական կինո» նկարել:

Մինչ պատգամավորները հարցեր էին ուղղում կառավարության ներկայացուցիչներին, հուզիչ տեսարան էր կառավարության համար նախատեսված վերջին նստարանին, հանդիպել էին Սարգսյան եղբայրները:

Վարչապետի օգնական Նաիրի Սարգսյանը, որը մշտապես Փաշինյանի կողքին է եւ նաեւ կառավարության հետ հայտնվում է խորհրդարանական դահլիճում, հենց այդտեղ հանդիպեց երկվորյակ եղբորը: Եվ Սարգսյանները որոշեցին ախպերներով սելֆիախառն իրենց անմահացնել քաղաքական թիվ մեկ դահլիճում»:

Մանրամասները՝ թերթի այսօրվա համարում