Բանտ կնստես, եթե խոսես․ դեպի բռնապետություն՝ մեկ քայլ
Ազգային ժողովի «Իմ քայլը» խմբակցության պատգամավոր Արմեն Խաչատրյանն, ով նախկինում եղել է ոստիկան, որոշել է Հայաստանը դեպի բռնապետություն տանելու ճանապարհին մի մեծ քայլ անել։
Նիկոլ Փաշինյանի շնորհիվ Ազգային ժողով հասած Խաչատրյանը որոշել է իր երախտագիտությունը հայտնել Նիկոլ Փաշինյանին և հեղինակել, շրջանառության մեջ դնել օրենքի մի նախագիծ, որով իրենք՝ իշխանությունները կդառնան անձեռնմխելիներ․ նրանց այդ նախագծի՝ օրենք դառնալու պարագայում այլևս հնարավոր չի լինի քննադատել, որովհետև դա կորակվի որպես քրեական հանցագործություն և իշխանությանը քննադատողն ու թթու խոսք ասողը կհայտնվի բանտում։
Եվ այսպես, իմքայլալական պատգամավոր Արմեն Խաչատրյանն առաջարկում է քրեականացնել իշխանության ներկայացուցչին հրապարակային վիրավորելու կամ նրա ծառայողական պարտականությունների կատարմանը խոչընդոտելու նպատակով գործողություններ կատարելը։
Օրինակ՝ իշխանության ներկայացուցչի ծառայողական պարտականությունների կատարմանը խոչընդոտող գործողություններ կատարելը, արգելքներ տեղադրելը` ոստիկանության տրանսպորտային միջոցների և վերակարգերի տեղաշարժը սահմանափակելու նպատակով, ոստիկանության տրանսպորտային միջոցի անվադողերը վնասելը, որևէ իրից բռնվելը` ձերբակալումից խուսափելու համար, ձերբակալող ոստիկանի բռնվածքից ուժով ազատվելը, նրա համազգեստից բռնելը, քաշքշելը, ձերբակալվող այլ անձին ոստիկանի «ձեռքից փախցնելը» և այլն պատգամավորը առաջարկում է համարել քրեական հանցագործություն և մարդուն դրա համար կալանավորել՝ մոռանալով, թե ինչպես է տեղի ունեցել իշխանափոխությունը։
Արմեն Խաչատրյանը մոռացել է մի քանի ամիս ետ գնալ և տեսնել, թե ինչպես են վիրավորում իշխանության ներկայացուցիչներին իր իսկ թիմակիցները, ինչպես են խոչընդոտում ոստիկանին իր ծառայողական գործողությունները կատարելիս։
Արմեն Խաչատրյանը կարող էր իր հեղինակած օրենքի նախագծին օրինակ հետադարձ ուժ տար և ուշադիր հետևեր, տեսներ, թե այդ դեպքում այսօրվա իշխանավորների քանի տոկոսը կհայտնվի կալաավայրում։
Ի դեպ, նշենք, որ դեպի բռնապետություն ճանապարհին Արմեն Խաչատրյանի այս նախագիծն առաջին ծիծեռնակը չէ, բոլորովին վերջերս էլ իմքայլականները մտածում էին տարբերակ գտնել ու Ազգային անվտանգության ծառայության միջոցով բացահայտել լրագրողների աղբյուրները։
Ինչ խոսք՝ իմքայալակաերի մտքի թռիչքները զավեշտալի են ու խիստ վտանգավոր ՀՀ պետականության համար։ Արդեն իսկ խոսվում է այն մասին, որ պատգամավորը, հաշվի առնելով հանրության բուռն քննադատությունը, շրջանառությունից դուրս հանի այս նախագիծը, բայց դա որևէ բան չի նշանակում, որ նա հրաժարվում է իր առաջարկություններից․ վստահաբար՝ եթե ոչ Արմեն Խաչատրյանի միջոցով, ապա այլ տարբերակներով ու այլ օրենքի նախագծերով իմքայլականները կգնան բռնապետության ճանապարհով, քանի որ միայն այդ դեպքում կարող են շարունակել իրենց գոյությունն՝ իշխանության վերին էշելոններում։