Կբացվի Սեդրակ Երկանյանի` «Ստեղնի թաքնված գույները» խորագրով ցուցահանդեսը
Մայիսի 31-ին՝ ժամը 15:00-ին, Հովհ. Շարամբեյանի անվան ժողովրդական ստեղծագործության կենտրոնում (ք. Երևան, Աբովյան 64) կբացվի ՀՀ մշակույթի վաստակավոր գործիչ, Հայաստանի առաջատար դաշնակահար-մենակատար Սեդրակ Երկանյանի` «Ստեղնի թաքնված գույները» խորագրով գեղանկարչական աշխատանքների ցուցահանդեսը:
Սեդրակ Երկանյանը ծնվել է 1954 թվականին Գյումրիում: Սովորել է Գյումրու երաժշտական դպրոցում։ Ավարտել է Երևանի Կոմիտասի անվան պետական կոնսերվատորիան՝ որպես դաշնակահար (1978 թ.) և դիրիժոր-խմբավար (1992 թ.)։ Հանդես է եկել Հայաստանի, Վրաստանի, Սանկտ Պետերբուրգի, Օմսկի, Իրկուտսկի և այլ սիմֆոնիկ նվագախմբերի հետ։
անդիսանում է «Խորան» կամերային երգչախմբի հիմնադիրը, գեղարվեստական ղեկավարն ու դիրիժորը։ Համագործակցել է Հայաստանի ակադեմիական երգչախմբի հետ որպես դաշնակահար-կոնցերտմայստեր (1978-2000 թթ.)։ Որպես խմբավար համագործակցել է Հայաստանի Ռադիոյի և Հեռուստատեսության կամերային երգչախմբի (1992 թ.), Հալեպի «Զվարթնոց» երգչախմբի (1993-1994 թթ.), Երուսաղեմի Սուրբ Յակոբեանց վանքի Ճեմարանի երգչախմբի (2004-2005 թթ.) հետ։ 1994 թվականից Հայաստանի «Տաղարան» հնագույն երաժշտության համույթի գեղարվեստական ղեկավարն ու դիրիժորն է: Սեդրակ Երկանյանն Անդրկովկասյան մրցույթի (1977 թ.) և Համամիութենական փառատոնի (1978 թ.) դափնեկիր է:
Ցուցահանդեսը կգործի մինչև ս. թ. հունիսի 7-ը:
Մուտքն ազատ է: