Ի՞նչ բարեկամական կապ ունի Տիգրան Մուկուչյանը հայ կնոջ սպանության մեջ կասկածվող ադրբեջանցու հետ. հաղորդում դատախազությանը (ֆոտո)
NEWSPRESS.am-ի խմբագրություն է ահազանգել ՀՀ քաղաքացի Սվետա Հակոբյանը։ Նա մեզ ներկայացրեց իր աղջկա կասկածելի մահվան հանգամանքները։ Նրա խոսքով՝ իրավական համակարգի տարբեր օղակներում գտնվող մարդիկ փաստական հանգամանքները փոփոխում են և իրողությունը խճճելով՝ սլաքները ճիշտ ուղուց շեղում։
Սվետա Հակոբյանը պատմեց, որ 2017 թվականի օգոստոսի սկզբին իր աղջկա՝ Մելինե Աղաջանյանի մահվան փաստի կապակցությամբ Կենտրոնի քննչական բաժնում քրեական գործ է հարուցվել։
«Ձերբակալվել է աղջկաս ամուսինը՝ Ռոման Ասրիյանը՝ ՀՀ քրեական օրենսգրքի 112-րդ հոդվածի 2-րդ մասի, 14-րդ կետով՝ նախատեսված հանցավոր արարք կատարելու կասկածանքով։ Դիահերձումն իրականացրած բժիշկների կողմից տրված նախնական բժշկական ակտի համաձայն՝ Մ. Աղաջանյանի մահը վրա է հասել սրտի կանգից, ինչի հիման վրա Ասրիյանին մեղադրանք է առաջադրվել ՀՀ քրեական օրենսգրքի 119-րդ հոդվածով, ինչի արդյունքում նա ազատ արձակվեց: Արդեն երկու տարի է, ինչ գործը քննվում է ՀՀ ՔԿ Աջափնյակ և Դավթաշեն վարչական շրջաններում քննիչ Վ. Կարապետյանի վարույթում, իսկ քննությունը տարվում է ամեն գնով իրականությունը թաքցնելու և եղած փաստերը մեր դեմ ուղղելու նպատակով միայն»,- պատմեց մեր զրուցակիցը։
Նա վստահեցնում է, որ կան բազմաթիվ փաստեր, որոնք վկայում են, որ Ասրիյանի կողմից իր աղջկա նկատմամբ հոգեբանական, ֆիզիկական ճնշում և խոշտանգում է տեղի ունեցել։ «Կան վկաների ցուցմունքներ ու նաև մեր միջնորդությամբ հարցաքննված հեռախոսային հաղորդագրություններ։ Կա նաև աղջկաս դստեր՝ անչափահաս Տատյանա Ասրիյանի ցուցմունքը՝ հոր կողմից իր մորը պարբերաբար բռնության ենթարկելու մասին։ Նման միջադեպ է եղել նաև մահվան նախորդող ժամանակահատվածում»,- իրավիճակը ներկայացնում է Սվետա Հակոբյանը։
Նա պատմում է նաև, որ հայրը նաև իր դստեր՝ Տատյանայի նկատմամբ է գործադրել ֆիզիկական և հոգեբանական ճնշումներ ու բռնություն, երբ աղջնակը փորձել է պաշտպանել մորը:
Մահվան նախորդող ժամանակահատվածում հոր կողմից մորը ծեծելու մասին հայտնում է նաև 5 տարեկան Ալեքսանդր Ասրիյանը, ով անմիջական ականատեսն է եղել:
«Վարույթն իրականացնող մարմնին մեր կողմից ներկայացվել է նաև Մելինե Աղաջանյանի լուսանկարը, որտեղ անզեն աչքով երևում է Աղաջանյանի մարմնի վրայի կապտուկները և արյունազեղումները, սակայն նախաքննական մարմինն այս փաստերին ոչ մի բան նշանակություն չի տվել»,- ասում է Սվետա Հակոբյանը:
Նա նշում է, որ իր աղջիկը հետծննդաբերական շրջանում հոգեբանական խնդիրներ է ունեցել, բուժվել է հոգեբուժարանում և բուժումից հետո խնդիրն այլ դրսևորում չի ստացել: Սակայն, մահից առաջ ընտանեկան ծանր մթնոլորտի շրջանում նորից սրվել է աղջկա հոգեբանական վիճակը, նրան անգամ տեղափոխել են այլ բնակարան, որպեսզի ապրի հանգստության մեջ, և երեխաները չտեսնեն իրենց մորն այդ վիճակում: Մելինեն նաև հրաժարվել է բուժում անցնելուց՝ վախենալով, որ վրայի կապտուկները կբացահայտեն բժիշկները և այդ կերպ կվնասի ամուսնուն:
Մելինեի մայրը պնդում է նաև, որ քննչական մարմինները փորձում են ամեն կերպ ապացուցել Ռ. Ասրիյանի անմեղությունը, մահվան հանգամանքները կոծկել և մահացողի մոր և եղբոր վրա բարդել: Սվետա Հակոբյանի խոսքով՝ Ռոման Ասրիյանը բավականին ապահովված է, իսկ սկզբնական շրջանում անգամ մարդկանց էր խառնում, որպեսզի իրենց համոզեին չբողոքել, այլապես «մեշոկով փող կթափի և գործը շուռ կտա մեր դեմ»:
Մահացողի մայրը մեզ հետ զրույցում նաև անուններ տվեց, թե ում ձեռքով կամ հովանավորությամբ է գործը «կարվում» իրենց վրա. «Թե՛ դատախազների, թե՛ քննչական մարմինների վարքագծից վստահ եմ, որ այս ամենը մեր դեմ արվում է Ռոման Ասրիյանի պատվերով: Մեր դեմ սարքած գործն այնքան ակնհայտ է և այնքան անհիմն, որ ոչ մի քննիչ ռիսկ չէր անի նման շինծու մեղադրանք առաջադրել, եթե չլիներ վերադասների պահանջը և ցուցումը: Ապօրինություններ են տեղի ունեցել նաև երեխաների խնամքի հարցով, Երևան քաղաքի Կենտրոն վարչական շրջանի խնամակալության և հոգաբարձության մարմինների կողմից՝ ի դեմս Երևանի քաղաքապետարանի պաշտոնյա իրավաբանական վարչության պետի տեղակալ Իդա Խաչատրյանի, ով Ռոման Ասրիյանի մորեղբոր որդու Անդրանիկ Մուրադյանի գործընկերն է, վստահ ենք նաև, որ այս գործերի քննությանը ապօրինի միջամտել է նաև ԿԸՀ նախագահ Տիգրան Մուկուչյանը և նրա կինը՝ Ինա Շահնազարյանը, ով Ռոման Ասրյանի մորաքրոջ աղջիկն է»,- ասում է Սվետա Հակոբյանը:
Ըստ որոշ տեղեկությունների՝ Ռոման Ասրիյանի դասընկերն է նաև քննչականի Մաշտոցի բաժնի պետը: Սվետա Հակոբյանը պատմում է նաև, որ նոր են իրենք պարզել՝ Ռոման Ասրիյանի հայրն ադրբեջանցի է (ստորև՝ տեղադրում ենք անձնագրի պատճենը), մոր հետ գաղթել են Հայաստան, հիմա էլ Ռոման Ասրիյանը փորձում է այնպես անել, որ մշտական բնակության գնա ԱՄՆ: Ռոման Ասրիյանը իր բիզնեսով սերտ կապի մեջ է նաև Թուրքիայի հետ և այդ փողերով է կարողանում Հայաստանում կոռուպցիոն սխեմա գծել և գործը բարդել մահացած Մելինե Աղաջանյանի մոր և եղբոր վրա:
Սվետա Հակոբյանը իրավապահ մարմինների ու մասնավորապես դատախազ Արթուր Դավթյանի ուշադրությունն է հրավիրում խնդիրն ու ակնկալում արդար դատավարություն ու հարցի շուտափույթ լուծում: