Գլխավոր դատախազի միակ շանսը
Երևանի ընդհանուր իրավասության դատարանի Ավան և Նոր Նորք վարչական շրջանների նստավայրում այսօր կայացավ 2-րդ նախագահ Ռոբերտ Քոչարյանի գործով դատական առաջին նախնական նիստը։
Նշենք, որ նիստին ներկա էր ամբաստանյալ Ռոբերտ Քոչարյանը։
Այս նիստի ժամանակ պետք է քննվեր Քոչարյանի խափանման միջոցի փոփոխման վերաբերյալ նրա պաշտպանների ներկայացրած միջնորդությունը, բայց քննվեց բոլորովին այլ բան։
Քանի որ Ռոբերտ Քոչարյանի գործը քննող դատավորին ԲԴԽ-ն հայտարարել էր նախազգուշացում՝ Քոչարյանի գործի վերաբերյալ ընթացակարգերում խախտում թույլ տալու համար, ուստի Քոչարյանի պաշտպանները դատարանում բարձրացրեցին դատավոր Դավիթ Գրիգորյանի ինքնաբացարկի հարցը։
Այս ինքնաբացարկը հիմքում պաշտպանները դրեցին ԲԴԽ-ի որոշումը, որը կարող է կախվածության մեջ գցել դատավորին այս գործը քննելիս։
Սակայն դատավոր Գրիգորյանին միայն ԲԴԽ-ի որոշումը չէ, որ կարող է կախվածության մեջ գցել․ նա ժամանակին եղել է գլխավոր դատախազ Արթուր Դավթյանի մտերիմ ընկերը, իսկ Դավթյանն այսօր մասնակցում էր դատական նիստին որպես մեղադրող կողմ, այնպես որ, առկա էր դատավորին կախվածությայն մեջ գցելու ևս մեկ հանգամանք։
Հետաքրքիր է, որ Արթուր Դավթյանի համար այս դատական գործը լինելու է հաղթաթուղթ գլխավոր դատախազի պաշտոնում մնալ-չմնալու համար։
Փաշինյանի գործուղմամբ դատարանի դահլիճում հայտնված Արթուր Դավթյանը պետք է ջանք ու եռանդ չխնայի՝ Քոչարյանի խափանման միջոց կալանավորման ընտրության և Քոչարյանին առաջադրված մեղադրանքը հիմնավորելու համար, ինչի համար թերևս նրան անհրաժեշտ եղավ այսօր դատարանի դահլիճ մտնել դատավորի սենյակից, ինչն անթույլատրելի է և արդարացի հարցեր է առաջացնում Քոչարյանի պաշտպանների մոտ։
Չի բացառվում, որ գլխավոր դատախազ Արթուր Դավթյանը գործը քննող դատավորին ցուցումներ է տվել, թե վերջինս ինչ կերպ պետք է տանի գործի քննությունը։
Վաղը պարզ կդառնա՝ Դավթյանի ընկերը կշարունակի՞ նախագահել Քոչարյանի գործը, սակայն այն, որ գլխավոր դատախազի համար այս դատական գործի հաղթանակն է լինելու պաշտոնին մնալու միակ հաղթաթուղթը, ակնհայտ է։
NEWSPRESS.am