Մի քիչ տղամարդ եղեք, ամոթ է. Արիանա Հովսեփյանը՝ պատգամավորին
Միջազգային երկու խոշոր լրատվական կառույցների՝ SEEMO-ի և IPI-ի խորհուրդների անդամ, NEWSPRESS.am-ի հիմնադիր-տնօրեն Արիանա Հովսեփյանը ֆեյսբուքյան իր էջում գրել է.
«Այսօր առավոտյան մտնում են Ֆեյսբուք և ապշում․ Ազգային ժողովի պատգամավոր Արմեն Փամբուխչյանն ի լուր ողջ մեդիայի տեղեկացնում է, որ մի աշխարհացունց գործ է արել։
Նա, պարզվում է, մայիսի 12-ի երեկոյան ականատես է եղել, թե ինչպես են մի տղամարդու ծեծում, կանգնել է, բացել իր մեքենայի դուռը, մեքենայից ցած իջել, միջամտել այդ ծեծին, ոստիկանություն և շտապօգնություն կանչել։
Փամբուխչյանը նաև կատարել է ոստիկանության գործառույթը և հրապարակավ տեղեկացրել, որ դեպքի հետ կապված չի զլացել, գնացել է նաև Կենտրոն և Նորք Մարաշ ոստիկանական բաժանմունք, և կասկածյալը բերման է ենթարկվել։ Իհարկե, Փամբուխչյանը չի գրել, բայց ակնհայտ է, որ այդ կասկածյալը բերման է ենթարկվել, քանի որ վստահաբար նրա դեմ ցուցմունք է տվել հենց ինքը։
«Իսկ տուժողին հեսա կմոտենան բժիշկները»,- մանրամասնել է պատգամավորը՝ չմոռանալով ժամով և վայրկյանով նշել, որ տուժողին հիվանդանոցում վիրակապում են, և վտանգավոր բան չկա։
Իհարկե, այստեղ մոռացել է գրել, թե վիրակապը դրվել է տեղակա՞ն, թե՞ այլ պետության արտադրության բինտով․ սա շատ կարևոր հանգամանք է, քանի որ իշխող ուժը նախընտրություն տալիս է միայն տեղական արտադրանքին։
Թե ինչու է պատգամավորը հերոսացել իր ֆեյսբուքյան էջում, կնախընտրեմ լռել, նույնը, սակայն, չեմ ցանկանա անել հետևյալ հարցադրումների վերաբերյալ․ ախր ո՞վ ես դու և որտեղի՞ց հայտնվեցիր Ազգային ժողովում։
Ախր քո գործն օրենք գրելն է և ոչ թե Ֆեյսբուքում հերոսանալը: Գործ արեք։
Ախր քեզ հարկատուներս աշխատավարձ ենք տալիս, որ օրենքի ուժով կանխես այս երկրում սկիզբ առած ու օր օրի թափ հավաքող թանկացումները։
Ախր քեզ հարկատուներս վճարում ենք, որ օրենքի դաշտում թույլ չտաս, որ խաբեն քեզ աշխատավարձ վճարող շարքային քաղաքացուն և, օրինակ, բենզինն ու գազը թանկացնեն։
Ախր դեռ որքան ենք սպասելու, մինչև այս մարդիկ հասկանան, որ ֆեյսբուքից անդին շատ պարտականություններ ունեն կատարելու և ի վերջո, մի քիչ տղամարդ եղեք, ամոթ է»։