Ռոդնինայի անվան դպրոցի անվանափոխումը վիրավորա՞նք է Կրեմլին
Երևանի Իրինա Ռոդնինայի անվան գեղասահքի մարզադպրոցը անվանափոխվեց:
Ճակատագրի հեգնա՞նքն է, թե՞ այստեղ էլ կա քաղաքական հաշվարկ, սակայն անվանափոխությունը եղավ Ռուսաստանի վարչապետ Դմիտրի Մեդվեդևի երևանյան այցից հետո ու Պուտինի՝ Հայաստան աշնանը կատարելիք այցից առաջ: Արդեն իսկ հնչել են կարծիքներ այն մասին, թե քայլը սխալ էր ու կարող է ունենալ բավականին տհաճ հետևանքներ հայ-ռուսական հարաբերությունների վրա: Ամեն ինչ սկսվեց նրանից, որ խորհրդային գեղասահքի լեգենդը, որն այժմ ՌԴ Պետդումայի պատգամավոր է, այցելեց Բաքու ու մասնակցեց Ադրբեջանում կազմակերպված, այսպես կոչված, Խոջալուի ցեղասպանության հիշատակի միջոցառումներին: Մենք արդեն առիթ ունեցել ենք նշելու, որ հայկական կողմի ընդվզումն այս առումով, առնվազն դիվանագիտական դիլետանտություն էր:
Ոչ մի տեղ գրված չէ, որ Ռուսաստանը Ղարաբաղյան հակամարտության պատմության հարցում պետք է ունենա հայամետ դիրքորոշում կամ պաշտպանի հայկական կողմի շահերը: Սակայն հստակ գրված է, որ Մոսկվան որևէ հարցի հանդեպ պետք է ունենա ռուսամետ դիրքորոշում, ինչը թելադրվում է նաև ռուսաստանցի պաշտոնյաներին, փորձագետներին, վերլուծաբաններին: Իրինա Ռոդնինան ռուսական շահերը ներկայացնող անձ է: Որպես այդպիսին, նրա համար Ղարաբաղյան հակամարտության պատմության մեկնաբանությունների առումով հավասարազոր արժեք ունեն ինչպես հայկական կողմի տեսակետները, այնպես էլ ադրբեջանական: Մոսկվան ունի բարձր մակարդակի հարաբերություններ և՛ Երևանի հետ, և՛ Բաքվի: Այս տեսանկյունից ելնելով, որևէ կերպ զարմանալի չպետք է համարել Ռոդնինայի մասնակցությունը Բաքվի միջոցառմանը:
Բացի այդ, Մոսկվայում որպես գլոբալ քաղաքական ուժային կենտրոնի, գործում են բազմաթիվ լոբբիստական հիմնադրամներ, որոնք նախկին սովետական տարածքում այս կամ այն պետության շահերն են ներկայացնում ու այն, որ Ռոդնինան մասնակցել է ադրբեջանական իշխանության կազմակերպած միջոցառմանը, գոնե ՌԴ ԱԳՆ խոսնակ Մարիա Զախարովայի ակնարկից պարզ էր, որ արդյունք է նման լոբբիստական հիմնադրամի աշխատանքի: Ճիշտ դիվանագիտության դեպքում նույն Ռոդնինային կարելի էր բերել Հայաստան՝ հայամետ միջոցառման մասնակցելու համար, և ոչ թե դեմարշ քայլեր կատարել:
Ու բացի այդ, երբ ՀՀ վարչապետի տիկին Աննա Հակոբյանը պատվիրակություն կազմած գնում է Արցախ ու խոսում խաղաղասիրությունից, բնական է, որ արդեն իսկ այդ քայլով առաջ բերելու էր Բաքվի համարժեք գործողություն գնալու՝ այսպես անվանենք՝ նախանձախնդրությունը:
Ուստի, այստեղ արդեն ռուսահայ կապիտալով կառուցված դպրոցի անվանափոխությամբ վրեժ լուծելը առնվազն նման է երեխայական խռովկանության: Բացի այդ, պուտինյան վարչակազմը, ինչպես նկատում ենք, բավական նախանձախնդիր է խորհրդային ժառանգության հանդեպ: Ռոդնինան խորհրդային սպորտի լեգենդ է ու այս քայլն արդեն որոշակիորեն վիրավորանք է հենց Կրեմլին:
NEWSPRESS.am