«Իհարկե՛ հայտնի է»․ Միհրան Պողոսյանի գրասենյակը հայտարարություն է տարածել
ԱԺ նախկին պատգամավոր Միհրան Պողոսյանի գրասենյակը արձագանքել է ԱԱԾ պետ Արթուր Վանեցյանի հայտարարությանը՝ ընդգծելով, որ Միհրան Պողոսյանի վայրը միշտ էլ հայտնի է եղել։ Գրասենյակից հորդորել են անտեղի չվատնել պետական ռեսուրսները։
Գրասենյակի տարածած հայտարարության մեջ մասնավորապես ասվում է․
«ԱԺ նախկին պատգամավոր Միհրան Պողոսյանի նկատմամբ հարուցված շինծու քրեական գործի շրջանակում իրավապահ մարմինները բաց չեն թողնում ցանկացած առիթ հանրությանը ներկայանալ թատերական հայտարարություններով։
Մասնավորապես, հայտարավում է, թե ուժայիններին հայտնի է Միհրան Պողոսյանի գտնվելու վայրը։
Իհարկե՛ հայտնի է։
Միհրան Պողոսյանը հարուցված գործի շրջանակներում, առաջին իսկ օրվանից, տրամադրել է իր գտնվելու վայրն ու հասցեն։
Եվս մեկ անգամ վերահաստատում ենք այն՝ ք․ Մոսկվա, Մոսֆիլմովսկայա 70 շենք, 1-ին կորպուս, բն 139։
Ավելին՝ ՀՔԾ քննիչին տրամադրվել է նաև Միհրան Պողոսյանի հեռախոսհամարը։
Կոչ ենք անում պատկան մարմիններին անտեղի չվատնել պետական ռեսուրսներն ու բեմականացված հայտարարություններով չփորձել օրենքի անխոնջ պահապաններ ներկայանալ։ Ձեր առաջնահերթ գործառույթը օրենքի և արդարության հաստատումն է»։