Դպրոցն ու եկեղեցին հակադրելը կոպիտ սխալ է, որը թույլ տվեց պատգամավորը
ԱԺ «Իմ քայլը» խմբակցության պատգամավոր Հովհաննես Հովհաննիսյանը «Կյանքը նոր Հայաստանի հին գյուղերում» նախագծի շրջանակներում կազմակերպված Կրթական խնդիրները նոր Հայաստանի հին գյուղերում» խորագրով քննարկման ժամանակ բավական վիճելի հայտարարություն է արել։ Անդրադառնալով կրթական խնդիրներին ու հատկապես Հանրապետության դպրոցների շենքային պայմանների խնդրին, պատգամավորն իր խոսքում ասել է, որ ավելի լավ կլիներ, որպեսզի գործարարները եկեղեցի կառուցելու փոխարեն դպրոցներ կառուցեին, քանի որ գյուղերում իրենց պարտքն են համարել եկեղեցի կառուցելը։
Աստվածաբանական կրթություն ունեցող պատգամավորից նման բան լսելը, այն էլ՝ նման ձևակերպմամբ, մի քիչ տարօրինակ է ամեն դեպքում։ Թեև մյուս կողմից էլ հասկանում ենք, որ երբեմն լինում է այնպես, որ ամենաթունդ հակակրոնական հայացքներ ունեցողները հենց աստվածաբանական կրթություն ունեցողներն են լինում, սակայն էականը սա չէ։ Էականն այն է, որ պատգամավոր Հովհաննիսյանը հակադրում է երկու իրողություն մեկմեկու, որոնք, կարելի է ասել՝ մեր ազգային ինքնության հիմնասյուներն են՝ դպրոցն ու եկեղեցին։ Այն, որ եկեղեցաշինությունը, այո, Հայաստանի նման փոքր ու սոցիալ-տնտեսական խնդիրներով հարուստ երկրում մի փոքր շատ է եղել, դա որևէ մեկս չենք վիճարկում։ Չենք վիճարկում նաև այն, որ հիմա մենք կարիք ունենք ավելի լավ շենքային պայմաններով, ավելի լավ լաբորատոր պայմաններով դպրոցների։ 21-րդ դարում ՀՀ ապագա քաղաքացին արժանի է, որպեսզի եվրոպական և ամերիկյան ստանդարտներին չզիջող դպրոցում ուսանի։ Ի վերջո, կրթությունը երկարաժամկետ մի այնպիսի ներդրում է, որը վստահաբար տալիս է իր պտուղները՝ ունես լավ կրթություն, ուրեմն ապագադ հուսալի ձեռքերում կլինի։
Սակայն նաև պետք է արձանագրենք, որ պատմականորեն մեկը մյուսի հետ անխզելիորեն կապված երկու ինստիտուտները հակադրելը սխալ է։ Ի վերջո, հայ դպրոցը հայ եկեղեցու ծնունդն է և հատկապես Հայաստանի սահմաններից դուրս՝ հայ դպրոցը գտնվում է հայ եկեղեցու հովանու ներքո։ Եվ բացի այդ, դպրոցը միայն գիտելիքներ փոխանցելու մեխանիկական հաստատություն չէ, այլ նաև դաստիարակչական հստակ առաքելություն ունեցող, հայ մարդ ու քաղաքացի կերտող օջախ ու այստեղ եկեղեցին միանշանակ ունի իր դերակատարությունը, անկախ օրվա իշխանությունների աշխարհայացքից ու աշխարհընկալումից։