Խնդրածս հանրակացարանի սենյակ է, պետք ա մի բա՞ն լիներ, որ հետմահու պարգևատրե՞ն. ապրիլյանի մասնակցի մայրը՝ քաղաքապետին
«Եթե ինձնից գումար են ուզում, ես էլ վերահսկողություն եմ դիմել, պետք է իմ երեխու գործը չանե՞ն»: Համապետական շաբաթօրյակի ժամանակ ասաց ապրիլյան քառօրյա պատերազմի մասնակից զինվորի մայրը: Նա օգտագործելով հարմար առիթը՝ մոտեցել էր Երևանի քաղաքապետ Հայկ մարությանին և ուզում էր նաև Նիկոլ Փաշինյանին տեսնել:
Կնոջ որդին ապրիլյանի մասնակից է և նա խնդրում է հանրակացարանի մի սենյակ տալ որդուն: Թեև այդ հարցով նա վաղուց է դիմել քաղաքապետին, սակայն մինչ օրս հարցը չի դրվել ավագանու նիստի քննարկմանը։:
«Ինչո՞ւ հարցը չեն դնում ավագանու նիստի: Արդեն մեկ տարի այդ հարցը ձգձում եք: Ժամանակին ինձնից փող են պահանջել՝ սենյակ հատկացնելու համար, ես էլ բողոքել եմ, դրա համա՞ր չեք որդուս սենյակ տալիս: Իմ երեխային սենյակ տրամադրելն ի՞նչ կապ ունի իմ բողոքի հետ Էդ մարդը, որ ուզել է, հիմա ինքն է դիմել, որ էդ սենյակն իրեն հատկացնեն: Ես ձայնագրություններ ունեմ, որ դրա համար են իմ դեմ թարսվել»,- ասաց կինը՝ պահանջելով հարցը դնել ավագանու նիստին:
Կինը նկարագրեց վիճակը. նրանք փոքրիկին են սպասում և տեղ չունեն օրորոցի համար: Զինվորի մայրը նկատեց, որ հիմա պատրաստվում է մոտենալ Փաշինյանին, ով այդ պահին մասնակցում էր շաբաթօրյակին:
«Լավ եք անում, մոտեցեք, բայց դրանից բան չի փոխվի»,- ասաց Մարությանը՝ հավելելով, որ հարցը պետք է մտնի ավագանի, և իրենից ոչինչ կախված չէ:
Կինը նկատեց, որ փոխքաղաքապետ Հայկ Սարգսյանի օգնականն իրեն ասել է, որ պետք է քաղաքապետը հարցը դնի օրակարգում:
«Սխալ են ասել: Քաղաքապետն այլևս ամենազոր չի: Ավագանու անդա՛մը կարող է հարցը դնել ավագանու նիստի»,- ասաց Մարությանը:
Կինը նկատեց, որ հիշում է, թե ինչպես է Մարությանն իրեն ընդունել և լսլել, սակայն դրանից իր հարցը չի լուծվել:
«Ես շնորհակալ եմ քաղաքապետի ընդունելությունից, բայց խնդրում եմ իմ երեխու գործը դնել ավագանու նիստի: Խնդրածս հանրակացարանի սենյակ է, ես բնակարան չեմ ուզում: Թաղապետը միջնորդագիր է ուղարկել, որ իմ երեխուն հատկացնեն սենյակը: Այստեղ ի՞նչն է խնդիրը: Մեկ տարի է՝ դիմել եմ, թող մերժեն, ոչ թե ասեն՝ սպասեք, դառնա համայնքինը, կտրամադրենք: Դժվա՞ր է մի սենյակ տրամադրել ապրիլյան պատերազմի մասնակից իմ որդուն: Այսինքն՝ իմ երեխային պետք է մի բան լիներ, որ հետմահու պարգևատրե՞ն»:
Ավելի ուշ նրանց մոտեցավ նաև վարչապետի օգնական Նաիրի Սարգսյանն ու ասաց. «Եկեք էսօր դրա մասին չխոսենք»: