«Անորոշ վիճակ է». Արամուսի գյուղապետը՝ դպրոցի դասադուլի և տնօրենի ընտրության մասին
Կոտայքի մարզի Արամուս համայնքի Վ. Առաքելյանի անվան միջնակարգ դպրոցում աշակերտները դասադուլ են արել: Այդ մասին լուրը NEWSPRESS.am-ի հետ զրույցում հաստատեց համայնքի ղեկավար Հրայր Նիկողոսյանը:
Նա Արամուսի համայնքապետ է դարձել 2002 թվականից:
«Դե, գիտե՞ք, ես այդքան էլ լավ չեմ տիրապետում հարցին, բայց երեկ մեզ մոտ դպրոցի տնօրենի ընտրություն ա եղել, ու առավոտյան երեխեքը երևի ինչ-որ բանից անհանգստացած՝ դասադուլ են արել»,-ասաց Հրայր Նիկողոսյանը:
-Ի՞նչը կարող էր անհանգստացնել երեխաներին:
-Տնօրենի թեկնածուները 4-ական ձայներ են հավաքել, աշակերտներն էլ դասադուլ են արել: Հետո իմ հորդորով, ու էլի հորդորներով երեխեքը մտել են դասի:
-Այսինքն՝ խնդիր չկա՞ այս պահին, և ամեն ինչ հարթվե՞լ է:
-Դե հորդորում ենք, որ գնան դասի. հարցը քննարկվելու է փոխվարչապետի մոտ, ու իմաստ չունի դասադուլը, քանի որ հարցը դեռևս վերջնական լուծված չէ (նկատի ունի տնօրենի ընտրության արդյունքները վերջնական չեն-հեղ.):
-Եթե ընտրության արդյունքները վերջնական չեն, ինչո՞ւ պետք է երեխաները դասադուլ անեին: Հնարավո՞ր է, որ արդեն կանխորոշված են հետագա արդյունքները:
-Չէ՛, եթե 4-4 ձայն է հավաքվել, ո՞վ է անցել, որ դասադուլ անեն: Երևի, երեխեք են, ծնողներ են, մտածում են, որ ինչ-որ մեկի կողմից պաշտպանվող ինչ-որ մեկը կարող ա լինի՝ չգիտեմ ես: Անորոշ վիճակ է, բայց դե որ էս պահին դեռ ոչ ոք չի անցել, փաստ ա:
Թե ինչը կարող էր անհանգստացնել դպրոցի 520 աշակերտին, դեռ ընտրությունների վերջնական արդյունքները չհրապարակած, NEWSPRESS.am-ը փորձեց պարզել դպրոցի նախկին տնօրեն Ֆրունզ Պողոսյանից:
Վերջինս լսեց, թե ինչ թեմայի շուրջ ենք ուզում հարց ուղղել իրեն ու կարճ պատասխանեց.
«Գիտեք, ես հիվանդանոցում եմ, ու նաև ես պաշտոնաթող տնօրեն եմ ու որևէ կապ չունեմ այդ ամենի հետ, կներեք»,-ասաց նախկին տնօրենը:
Նկատենք, որ դպրոցի տնօրենի թափուր պաշտոնի համար հայտարարված մրցույթին մասնակցել են Անդրեյ Փիլիպոսյանը և Նոնա Պողոսյանը: Քանի որ նրանք հավասարաչափ ձայներ են հավաքել, ուստի կրկնակի քվեարկություն է եղել, ինչից հետո արդյունքները նույնն են եղել:
Այժմ ծնողները վստահ են, որ նախարարությունը նախապատվություն է տալու Նոնա Պողոսյանին: Մինչդեռ իրենք ուզում եմ տնօրենի պաշտոնում տեսնել իրենց դպրոցի ուսուցիչ Անդրեյ Փիլիպոսյանին:
Հատկանշական է նաև, որ դասադուլ են արել միայն աշակերտները, իսկ ուսուցիչներն այդ ամենին չեն մասնակցել: