Ծխախոտը վնաս է, հացը գիրացնում է, կարտոֆիլը օսլա է, բենզինով էլ ինքնահրկիզվում են. թանկացնե՛լ
Մեր երկրի առողջապահության նախարարը ինքնաբերաբար որոշ հարցերի սպառիչ պատասխաններ է տվել: Արսեն Թորոսյանը, ով համարվում է այս կառավարության միակ աշխատող նախարարը, հետաքրքիր նախաձեռնությամբ է հանդես եկել. շուրջ 45 տոկոսով թանկացնում է ծխախոտի գինը զուտ այն բանի համար, որ այն մարդկանց առողջությանը վնաս է:
Երկար մտածեցինք, ճի՞շտ է արդյոք Արսեն Թորոսյանը, թե՞ ամեն դեպքում ծխող մարդը ծխախոտի գնի մասին իմանալիս մի հատ էլ ավել գլանակ չի քաշի ու ասի՝ «արա լավ, մի սիգարետ էր, դա էլ են ուզում վրաներիցս կտրեն»:
Թե ինչքանով կստացվի Արսեն Թորոսյանին ծխախոտի գինը բարձրացնելով՝ կանխել մարդկանց առողջությանը վնասակար երևույթների գոյությունը, բայց եթե այս տրամաբանությամբ նայենք, ապա մեր իշխանությունները բավականին լուրջ քայլեր են սկսել հանրային առողջության պահպանմանը միտված:
Օրինակ՝ բանանը թանկացել է (այսօր գնել ենք 950 դրամով), որովհետև շաքարային դիաբետով հիվանդ մարդկանց հակացուցված է: Փրկում ենք դիաբետիկներին նաև գազավորված ըմպելիքներից, դրանք պարզապես հրեշ են այդ հիվանդությունները կրողների կյանքում:
Ալյուրը թանկացել է շուրջ 35տոկոսով, այո՛, այս կերպ մարդկանց փրկում ենք ավելորդ քաշ հավաքելուց:
Թանկացնում ենք նաև կարտոֆիլի գինը, նախկին՝ 150-200-ի փոխարեն այն հասցնելով 250-300-ի, կարտոֆիլն ամբողջությամբ օսլա է, բա օսլա պե՞տք է մեզ, չէ՞ որ այն ծծմբական թթվի կատալիտիկ ներգործությամբ փոխակերպվում է գլյուկոզայի։
Մանավանդ այս սեզոնին արգելված է ուտել լոլիկ, վարունգ, չէ՞ որ դրանք «պառնիկի» են, իսկ մենք պետք է ուտենք միայն Արարատյան դաշտինը:
Բենզինի գինն ենք թանկացնում, դա մի շատ վտանգավոր նյութ է, որով քաղաքացիները ուզում են ինքնահրկիզվել քաղաքապետարանի կամ կառավարության շենքի մոտ, երբ փորձում են քանդել մարդու օրվա ապրուստի միջոց խանութը կամ, երբ 49-ամյա տղամարդը սոցիալական ծանր վիճակին չդիմանալով՝ հրկիզվում ու մահանում է (Դեպքերը հանրահայտ իրողություն են):
Այս կառավարությունը նաև չի մոռանում անասունների մասին՝ 50 կգ պարկով անասնակեր թեփի գինը բարձրացնելով 5 դոլար 40 ցենտով, բա մնա գոմում, թեփ ուտի՞, թող գնա չոլերը՝ խոտ ուտի:
Եթե այս ամենը ձեզ մտահոգեց ու ցանկանում եք մի փոքր խորհել մեր պետության վաղվա օրվա մասին՝ նստելով մոտակա սրճարանում ու վառելով արդեն թանկացած ծխախոտը, ապա հիշե՛ք, սրճարաններում համատարած թանկացումներ են. հարկատեսակ է փոխվել, իսկ սրճարանի պատին գրված է՝ թողեք աշխատենք, դե դա էլ փոքրիկ ակցիա է, եթե դու հաշվապահ ես, փաստաբան, ծրագրավորող կամ երգիչ՝ մի՛ մոռացիր՝ քո վճարելիք հարկերն էլ են բարձրացրել, որպեսզի դու քիչ աշխատես, չհոգնես, եկամտի որոշակի շեմ չանցնես ու սկսես ԱԱՀ-ով հարկվել:
Եթե զզվեցիր այս ամենից, գնացիր քո տուն, սրճեփը դրեցիր գազօջախին ու ձեռքդ մեկնում ես այն միացնելու՝ ապա հիշիր՝ գազի հոտը տհաճ է, ինքը՝ գազն էլ՝ պայթունավտանգ. գազը ևս կթանկանա:
NEWSPRESS.am