Գուրգեն Եղիազարյանի պահանջը կարող է պայթյուն առաջացնել
«Բաց հասարակության հիմնադրամներ-Հայաստան»-ի ղեկավարն օրերս հանդես եկավ մամուլի ասուլիսով, որի ժամանակ պատասխանեց Հիմնադրամի հասցեին արվող բազմաթիվ քննադատությունների ու տարբեր հարցադրումների։
Այս ասուլիսի ժամանակ Հիմնադրամի ղեկավար Լարիսա Մինասյանը, կարելի է ասել, աղմկահարույց մի քանի հայտարարություն արեց․ նախ նա բացահայտեց, որ Սորոսի հիմնադրամից ֆինանսավորվում են ինչպես նախկին, այնպես էլ ներկա իշխանությունների որոշ ներկայացուցիչներ և այդ ֆոնին հիշեց Հայկ Բաբուխանյանին, Գևորգ Կոստանյանիn։ Մինասյանը նաև հիշեց հայտնի պաշտպան Հայկ Ալումյանին։
Այս անձինք ու նրանց հետ նաև մի շարք այլ ներկա ու նախկին պաշտոնյաներ ֆինանսավորվել են Սորոսի հիմնադրամից։ Մինասյանը նաև չհերքեց Սորոսի կապը իշխանափոխության հետ, ինչը խիստ մտահոգում է ԱԱԾ նախկին փոխնախարար Գուրգեն Եղիազարյանին։
Նա պահանջում է վարչապետից որդեգրած թափանցիկությանը համահունչ բացատրություն տալ՝ թե՞ ինչ կապ ունի ինքն այս Հիմնադրամի հետ։
«Երկրագնդում չի եղել մի արյունահեղություն, որտեղ ներգրավված չլինի «Բաց հասարակության հիմնադրամներ»-ի հիմնադիր Ջորջ Սորոսը։ Արաբական գարունը կատարվել է Սորոսի փողերով՝ մասնավորապես Լիբիայի դեպքում։ «Բաց հասարակության հիմնադրամներ» հայաստանյան գրասենյակի գործադիր տնօրեն Լարիսա Մինասյանի հայտարարությունը՝ կապված թավշյա հեղափոխությանն աջակցելուն արտացոլում է Սորոսի ազդեցությունը Հայաստանում»,-ասում է Եղիզարյանը և հիշեցնում, որ Հայաստանում առաջին «սորոսյան» գրասենյակը հիմնադրվել է 1999 թվականին և այն ղեկավարել է Գարեգին Չուքասզյանը:
Փաստորեն, Գարեգին Չուքասզյանն ու նրա հիմնադրած «Սասնա Ծռեր» կուսակցությունը ևս այս կամ այն կերպ առնչվում է Սորոսի հիմնադրամին, ինչը ենթադրում է, որ Ծռերը ևս պետք է բացատրություն տան սրա առնչությամբ՝ հերքեն իրենց կապը կամ հաստատեն այն․ չի բացառվում, որ պարզվի, որ նրանք ևս գրանտներ են ստացել Սորոսի հիմնադրամից։
Գուրգեն Եղիազարյանը զգուշացնում է, որ ի տարբերություն Սերժ Սարգսյանի, որը կասկածվում էր մի ուղղությամբ տեղի ունեցող խաղերով, Փաշինյանը կասկածի տակ է դրվում տարբեր ուղղություններով։
Հետևաբար, Փաշինյանը պետք է պատասխան տա, թե ի՞նչ կապ ունի Լարիսա Մինասյանի հետ, թե ով է վերահսկողության ծառայության պետ Դավիթ Սանասարյանը, անվտանգության խորհրդի քարտուղար Արմեն Գրիգորյանը։
Հասարակությունը սպասում է Փաշինյանի պատասխանին, հենց նա է այս անփորձ, միայն քայլել իմացող երիտասարդներին վստահել երկրի կարևորագույն ոլորտները, հետևաբար պատասխանատվությունը բացառապես Փաշինյանի վրա է։