«Թալանը շարունակվում է, ոչ մի բան չի փոխվել». Մարալիկում դարձյալ պահանջում են համայնքապետի հրաժարականը
Մարալիկում դարձյալ պահանջում են համայնքի ղեկավար Արտակ Գևորգյանի հրաժարականը: Մի խումբ գյուղացիներ փակել են գյուղապետարանի մուտքը:
«Թալանը շարունակվում է, ոչ մի բան չի փոխվել»,- լրագրողների հետ զրույցում ասում են մարալիկցիները: Նրանք նկատում են, որ թեև ասում են, թե քրեական գործեր կան հարուցված, սակայն իրենք շոշափելի փոփոխություններ չեն տեսնում:
«Մենք մեր բողոքի ակցիայով կանխում ենք հետագա թալանը»,- ասում են հավաքված մարալիկցիները, ովքեր վստահեցնում են, թե իրենց համայնքապետը լեգիտիմ չէ:
«Մինչև հրաժարական չտա Գևորգյանը, մենք մուտքը չենք բացելու»,- ասում են մարալիկցիները:
Նրանք ստորագրահավաք են կազմակերպել. ասում են՝ 4500 ստորագրություն ունեն, բայց որոշ մարդիկ եկել ու ջնջել են իրենց անունները:
«Արտակ Գևորգյանը վախեցրել ա, նրանք էլ վախի մթնոլորտում եկել, ջնջել են: Բայց դա չի նշանակում, որ մենք քիչ ենք»,- ասում է գյուղացիներից մեկը:
Հարկ է նկատել, որ համայնքապետարանի մուտքը փակողների թիվը չէր գերազանցում 20-ը: վերջիններս վստահեցնում են, որ եթե հարկ լինի, իրենց բոլորը կմիանան:
«Մինչև հիմա ասել են՝ սպասեք, քանի որ քրեական գործեր կան հարուցված, ասել են՝ շուտով հարցերը կլուծեն, բայց ոնց տեսնում ենք՝ ոչ մի բան չեն անում, էլ ինչի՞ն սպասենք»: