Նազենի Ղարիբյանի համար թատրոնների և մյուս ՊՈԱԿ-ների վերամիավորումը նորմալ է, իսկ դրանց շուրջ աղմուկը՝ «անիմաստ»

Այո՛, որոշ մշակութային ՊՈԱԿ-ներ հնարավոր է վերամիավորվեն․ մարտի 5-ին նախագիծը կներկայացվի կառավարության հաստատմանը։

Այդ մասին այսօր լրագրողների հետ հանդիպմանն ասաց ՀՀ մշակույթի նախարարի պարտականությունները կատարող Նազենի Ղարիբյանը՝ անդրադառնալով իր մշակած նախագծին, ըստ որի՝ առաջարկում է Սոս Սարգսյանի անվան համազգային պետական թատրոնը, Հայաստանի երգի պետական թատրոնը, Երևանի կամերային պետական թատրոնը, Երևանի կամերային երաժշտական թատրոնը, Հայաստանի պետական ֆիլհարմոնիան, Կոմիտասի անվան ազգային քառյակը և ՊՈԱԿ-ի կարգավիճակ ունեցող 15 այլ կազմակերպություններ լուծարել, վերակազմավորել կամ/և վերակազմակերպել:

Լրագրողների դիտարկմանը, թե, օրինակ, Համազգայինի արտիստները պատրաստ չեն վերամիավորման, Նազենի Ղարիբյանն արձագանքեց․

«Ոչ ոք նրանց չի ասում վերամիավորվել այլ թատրոնի հետ, հենց էդ ա էլի, դուք չեք կարդացել, թե հստակ ինչ է գրված նախագծում»։ Հակադարձելով Ղարիբյանին՝ լրագրողը նկատեց․ «Եթե Դուք հստակ շարադրեիք, թե ինչ եք նախատեսում անել ՊՈԱԿ-ների հետ, ես կհասկանայի, բայց այն թուղթը, որի մասին խոսում եք, չի պատասխանում մի շարք հարցերի»,-ասաց լրագրողն ու խնդրեց որոշ հարցեր հստակեցնել։

Մասնավորապես․

1․ Համազգային թատրոնը շարունակելո՞ւ է աշխատել այնպես, ինչպես աշխատում էր մինչև այդ թղթի ի հայտ գալը

2․ Ստանալո՞ւ են արդյոք իրենց 67 մլն դրամ պետական աջակցությունը

3․ Եվ ընդհանրապես, ո՞ր թատրոնն է լուծարվելու

Ղարիբյանը խոստովանեց, որ այս հարցերին հստակ պատասխան չունի։

Հարցին՝ ուզում եք ասել այս աղմուկն անիմա՞ստ էր, Ղարիբյանը դրական պատասխանեց։

«Այո»,-ասաց նա, ինչին արձագանքելով, լրագրողները հարցրին, թե այդ դեպքում ինչո՞ւ էր հավաքում Ղարիբյանը ՊՈԱԿ-ների ղեկավարներին, և ինչո՞ւ պարզապես չի հայտարարում, որ նման բան, և ոչ մի ՊՈԱԿ չի լուծարվի։

Պարզվում է՝ Նազենի Ղարիբյանը տնօրեններին հավաքել է զուտ այն պատճառով, որ օրըստօրե թեժացող լուրերի մեջ զգացել է՝ տնօրենները վիրավորված են։

Նա այդպես էլ հստակ չպատասխանեց վերը շարադրված հարցերին, Ղարիբյանը նկատեց, որ այլընտրանք չունեն, քան վերամիավորումը, քանի որ ցուցակում ընդգրկված ՊՈԱԿ-ներից մեծ մասը հաճախորդներ չունեն։ Հարցին, թե հնարավոր չէ՞ արդյոք ֆինանսավորել և պատշաճ գործարկել այդ ՊՈԱԿ-ները, Ղարիբյանը պատասխանեց․

«Պետությունը գումարներ չունի, որպեսզի ֆինանսավորի, դրա համար մենք պետք է միավորենք դրանք։ Իսկ այն ՊՈԱԿ-ները, որոնք լավ են աշխատում և կարող են ինքնաֆինանսավորմամբ գոյատևել՝ պետք է դուրս գան պետական հոգածությունից»,-ասաց Ղարիբյանը և հավելեց․ «Եթե դուք ունեք 3 երեխա, մեկն արդեն ինքնահաստատվել է, էն մյուսը մեկ այլ փուլում է, դուք բոլորին նույն չափանիշներո՞վ եք մոտենալու»,- հարցերց մշակույթի նախարարի պարտականությունները կատարող Նազենի Ղարիբյանը։

Ու չնայած այն բանին, որ հաստատեց ՊՈԱԿ-ների վերամիավորումը՝ հայտարարեց․ «Սա ոչնչից ստեղծված աղմուկ է»։