Արտախորհրդարանական 10 ուժեր ստեղծում են համաժողովրդական հարթակ
Արտախորհրդարանական տասը ուժ միավորվել են «Նոր Սահմանադրություն» նախաձեռնության շուրջ և ստորագրել հուշագիր:
Այդ մասին այսօր մամուլի ասուլիսի ժամանակ հայտարարեցին «Ազգային առաջընթաց» կուսակցության նախագահ Լուսինե Հարոյանը, «Հայ կառուցողական կուսակցություն» նախագահ Անդրիաս Ղուկասյանը և «Նժդեհյան ցեղակրոն» կուսակցության նախագահ Գևորգ Հովսեփյանը։
Վերջինս նկատեց, որ Սահմանադրությունը պատկանում է ազգին և գրվում է արժեհամակարգի հիման վրա:
«Մենք պետք է հասկանանք, թե ինչ է Սահմանադրությունը: Պետք է հասկանալ, թե որտեղից է գալիս և ինչ է ուզում այն: Սահմանադրությունն այնքան էլ դեկլարատիվ չէ»,-ասաց նա՝ հավելելով, որ Նիկոլ Փաշինյանի ռեյտինգը երկրաչափական պրոգրեսիայով ընկնում է:
Լուսինե Հարոյանն էլ նկատեց, որ միավորված 10 ուժերը ստեղծում են համաժողովրդական հարթակ՝ փոխելու Սահմանադրությունը լայն հանրային քննարկումների արդյունքում։
«Այլևս այնպես չպետք է լինի, որ կուսակցությունները գրեն ու վերջ: Սահմանադրությունը պետք է փոխվի, դա միանշանակ է, քանի որ հասկանում ենք, թե ում համար և ինչպես է փոխվել Սահմանադրությունը»,- ասաց Լուսինե Հարոյանը՝ ընդգծելով, որ այսօր իշխող կուսակցությունը Սահմանադրությունը փոխելու քաղաքական կամք չի ցուցաբերում։
Անդրիաս Ղուկասյանի դիտարկմամբ էլ՝ այսօր Սահմանադրությունն ունի մի շարք թերություններ, որոնք շտկման կարիք ունեն։
Նրա խոսքով՝ նախկինում հանրապետականները հայտարարում էին, թե իշխանությունն անցնում է Մելիք Ադամյանի փողոցով, իսկ այսօրվա իշխող կուսակցությունը թեև նման բան չի հայտարարում, սակայն, ըստ էության, տրամաբանությունը նույնն է:
Բացի այդ, Անդրեաս Ղուկասյանն արդարացիորեն նկատում է․ «Սահմանադրական բարեփոխման առաջարկը նաև տրամաբանական է այն քաղաքական ընթացքի տեսանկյունից, որ երկրում տեղի է ունեցել հեղափոխություն, ինչը պետք է բերի սահմանադրական կարգի փոփոխության, եթե դա տեղի չի ունենում, ուրեմն ստացվում է, որ տեղի է ունեցել իշխանափոխություն»,-ասաց նա: