Ալեն Սիմոնյանն անձի երկվություն ունի. կարճ հիշողությամբ խայտառակում է իրեն
Մեր երկրի Ազգային ժողովի փոխնախագահ Ալեն Սիմոնյանին կարծես թե տանջում են բարդույթները: Տպավորություն է, թե այս մարդը ցանկանում է այնպես անել, որ մշտապես մեդիայի գլխավոր էջերում հայտնվի:
Նա որդեգրել է մի ձեռագիր, ըստ որի՝ յուրաքանչյուր թեմա կարող է դնել շրջանառության մեջ, որը քննարկման լայն ընդգրկում կարող է ունենալ: Դրոշի, հիմնի փոփոխությունների առաջարկից հետո Ալեն Սիմոնյանը հիմա էլ մեկ այլ հայտարարություն է արել, որը ևս բուռն քննարկման առիթ է դարձել:
Փետրվարի 7-ին, լրագրողների հետ զրույցում անդրադառնալով այն լուրերին, որ Գևորգ Կոստանյանը միջազգային հարթակներում առաջ է տանելու Արցախյան հարցը, Ալեն Սիմոնյանն ասել է, թե պարոն Կոստանյանը դեռ կարող է ծառայել Հայաստանի Հանրապետությանը: «Ես իրեն համարում եմ ՀՀ ամենաարհեստավարժ իրավաբաններից մեկը: Կարծում եմ՝ լավ կլինի, որ նա ինչ-որ մի տեղ իր ծառայությունները մատուցի Հայաստանի Հանրապետությանը: Գևորգ Կոստանյանին դիտարկել քաղաքական միավոր՝ ես պատրաստ չեմ, քանի որ նա չի եղել ՀՀԿ անդամ, իսկ որպես իրավաբան՝ կարող եմ ասել, որ լավագույններից է: Ես նրան ճանաչում եմ դեռևս ԵՊՀ-ից և կարող եմ ասել, որ որպես մասնագետ, որպես իրավաբան՝ պարոն Կոստանյանը լավագույններից է»:
Իհարկե, ոչ ոք չի մոռացել, որ անկուսակցական Գևորգ Կոստանյանը ժամանակին հանդես էր եկել հայտարարությամբ և նշում էր, որ պատրաստ է օժանդակել Նիկոլ Փաշինյանին և նրա կառավարությանը: Նա Փաշինյանին որակել էր ազնիվ և պարկեշտ մարդ: Այսօր էլ չի բացառվում նրա՝ մի ինչ- որ յուղոտ պաշտոնում նշանակվելը: Գուցեև, Ալեն Սիմոնյանի միջոցով պարզապես հանրության տրամադրվածությո՞ւնն է ստուգվում, սակայն պետք է նշել, որ այդ փորձի պատճառով ներկա իշխանությունները պարզապես զավեշտալի դրության մեջ են դնում իրենց թիմի առանցքային դեմքերից մեկին:
Բանն այն է, որ լավ հիշողության տեր մարդիկ չեն մոռացել, թե ինչ բախում առաջացավ Ազգային ժողովում Ալեն Սիմոնյանի և Գևորգ Կոստանյանի միջև, երբ ԱԱԾ տնօրենի և ՀՔԾ պետի հեռախոսազրույցի գաղտնալսման աղմկահարույց հրապարակման թեման էր քննարկվում:
Զեկուցող Գևորգ Կոստանյանին Էդմոն Մարուքյանն ասում էր, թե ԱԺ կանոնակարգ օրենքով իրավունք չկա քննիչ հանձնաժողով ստեղծել, քանի դեռ քննություն է ընթանում, Կոստանյանն էլ պնդում էր, թե ԱԺ արտահերթ նիստը և քննիչ հանձնաժողովը նպատակ ունեն ոչ թե բուն փաստը քննել, այլ այն, որ խախտվել է անձի և քաղաքացու՝ գաղտնիության իրավունքը: Գևորգ Կոստանյանի պատասխանը չէր բավարարել Ալեն Սիմոնյանին: Նա կասկածի տակ դրեց Կոստանյանի իրավաբանական գիտելիքները և ասաց՝ մեջբերում ենք՝ «Եթե Ձեր ուսանողը Ձեզ այսպես պատասխաներ, պետք է 2 նշանակեիք, ուղարկեիք տուն: Օրենք գոյություն ունի, տենց լավ իրավաբաններ եք, մի հատ նայեիք օրենքը, սա կանոնակարգ օրենքի խախտում է լինելու»:
Իհարկե, Ալեն Սիմոնյանին Գևորգ Կոստանյանն իր պատասխանով պարզապես գրողի ծոցն ուղարկեց, բայց լեզվակռիվը շարունակություն ստացավ. մեջբերում ենք՝
Կոստանյան- Ձեր գնահատականները իմ դասախոսական գործունեության վերաբերյալ չեք կարող տալ, քանի որ, դժբախտաբար, Ձեզ դաս չեմ տվել: Եթե Ձեզ դաս տված լինեի, այդկերպ չէիք վերաբերվի Քրեական օրենսգրքի և ԱԺ կանոնակարգի մեկնաբանություններին
Սիմոնյան- Բարեբախտաբար, ինձ դաս չեք տվել, եթե դաս տայիք, ես դասի չէի գա ու մեխանիկորեն կստանայի:
Կոստանյան- Ձեր ինքնավստահությունը Ձեր իրավաբանական գիտելիքների վերաբերյալ ողջունելի է, բայց մեկնաբանություններն ավելորդ են:
Մի խոսքով՝ Ալեն Սիմոնյանը, ով այսօր պնդում է, թե Գևորգ Կոստանյանը լավ իրավաբան է, ամիսներ առաջ այլ կարծիքի էր, քննությունն էլ մեխանիկորեն կանցներ: Ի՞նչ է փոխվել, սակայն, և ո՞ւր է փչում քամին՝ դժվար է ասել, բայց այն, որ քամին իր հետ մաքրում, տանում է որոշ մարդկանց հեղինակությունը՝ հաստատ է: Այս խոսքուզրույցն իր մտքի դավթարում պետք է ունենար Ալեն Սիմոնյանը և գոնե ինքը Կոստանյանին «մաքրելու» և պաշտոնին պատրաստելու գործն իր ուսերին չվերցներ:
Ստացվում է՝ Ալեն Սիմոնյանի մոտ գաղափարական շեղումներն այն աստիճանի են փոխվում և այնքան արագորեն, որ գուցե Սերժ Սարգսյանին էլ ինչ-որ մի օր հրավիրի ՔՊ թիմ՝ օգնելու իրենց:
Կրկեսը դեռ շարունակվում է և ավելի հետաքրքրանում: