Վանեցյանը հանդիպել է Բագրատաշենի անցակետը փակած քաղաքացիների հետ (տեսանյութ)
Այս պահին Բագրատաշենի անցակետը բաց է, սակայն ակցիան ամեն պահի կարող է շարունակվել։ Այդ մասին NEWSPRESS.am-ին են հայտնում Թուրքիայից ապրանք ներկրող ՀՀ քաղաքացիներ, ովքեր արդեն մի քանի օր է՝ փակել էին Բագրատաշենի մաքսային կետի մուտքն ու ելքը։
Առևտրականները դժգոհում են, որ մեկ շաբաթ առաջ ապրանք են բերել Ստամբուլից, սակայն վրացական կողմը թույլ չի տվել այն տեղափոխել Հայաստան։ Նրանց հազիվ է հաջողվել Վրաստանում ՀՀ դեսպանի միջամտությամբ լուծել խնդիրը և հասնել Բագրատաշեն, երբ այստեղ ևս նոր խնդիր է ծագել․ 25 կգ բեռից ավելի չեն կարող ներմուծել։
«Մինչև ընտրությունները կարողանում էինք 50 կգ էլ բերել ու խնդիր չէր լինում։ Հիմա չե՞նք կարողանալու»,- իր վրդովմունքն արտահայտեց Գայանե Այվազյանը։
Մյուսներն էլ նկատեցին, որ իրենք են տերը երկրի և ինչ ուզեն՝ կանեն․ եթե իրենց թույլ չեն տալու անցկացնել իրենց բեռը, ապա կփակեն անցակետը։
Ամբողջ գիշեր նրանք փակել են ճանապարհհը, իսկ արդեն այսօր կեսօրին ցուցարարներին հանդիպելու է գնացել ԱԱԾ պետ Արթուր Վանեցյանը: Մեզ հետ զրույցում Գայանե Այվազյանը չբացառեց, որ հետագայում իրավիճակը կարող է կրկնվել, և նմանատիպ ակցիաներ լինեն, քանի որ հունվարի 1-ից ուժի մեջ դրված օրենքը նրանց ձեռք չի տալիս։
Հիշեցնենք, որ 2019 թվականի հունվարի 1-ից առանց մաքսատուրքերի ու հարկերի վճարման ներմուծվող ապրանքների արժեքային չափը կրճատվել է 3 անգամ, իսկ կշիռը՝ 2 անգամ: Փոփոխությունները նախատեսված են Եվրասիական տնտեսական հանձնաժողովի խորհրդի` 2017թ. դեկտեմբերի 20-ի «Անձնական օգտագործման ապրանքների հետ կապված առանձին հարցերի վերաբերյալ» թիվ 107 որոշման մեջ ԵՏՀ 2018թ. նոյեմբերի 1-ի թիվ 91 որոշմամբ: