Դուք ճանապարհ փակելու լիազորությունը չունեք՝ դա կառավարության դեմ է․ Փաշինյանը՝ Մանվել Գրիգորյանի դեմ ցույցերի մասին
Բարև ձեզ, սիրելի հայրենակիցներ, հուսով եմ՝ լավ եք։ Այսպես սկսեց ՀՀ վարչապետ Նիկոլ Փաշինյանն իր հերթական ֆեյսբուքյան ուղիղ եթերը։ Վերջինիս հիմնական նպատակն էր, որպեսզի տեղեկացնի, որ այսուհետ ֆեյսբուքյան լայվերը կպակասեն, քանի որ աշխատանքից կտրվելը դժվար է, ժամանակ չունի և հոգնած է լինում։
Այս երկար-բարակ նախաբանից հետո, Փաշինյանն անդրադարձավ լրատվամիջոցներին։ Նա նկատեց, որ լրատվամիջոցները փորձում են նոր իշխանությունը «հանրապետականացնել», այսինքն՝ ասել, որ նույնն են։
«Ասում են՝ էս վարչապետն էլ ունի երկու ձեռք, երկու ոտք, էն վարչապետն էլ ուներ երկու ձեռք, երկու ոտք, նույնն ա։ Ես սա պատկերավոր եմ ասում, բայց ուզում են ասել, որ ամեն ինչ նույնն է»։
Փաշինյանն անդրադարձավ նաև իր որդու՝ ժամկետային զինծառայող Աշոտ Փաշինյանի արձակուրդին։ Նա նշեց, որ լրատվությունը շատ է անդրադառնում իր ընտանիքի անցուդարձին ու իր անձնական գործերին։
Իհարկե, նա չմասնավորեցրեց, որ այդ ինքն է իր ֆեյսբուքյան էջով ի ցույց դնում առօրյան։ Մի խոսքով՝ մի քանի պոպուլիստական բացատրություններից ու ոչ այնքան համոզիչ «պարզաբանումներից» հետո, ի վերջո, նա անցավ գլխավոր թեմային՝ կապված գեներալ Մանվել Գրիգորյանի ազատ արձակման դեմ բողոքի ակցիային։
«Ես գիտեմ, որ մարդկանց մոտ հարցեր են ծագում, որ բռնեցին, բաց թողեցին, հետո էլի բռնեցին, բաց թողեցին, և գիտեմ, որ որոշակի նյարդայնություն առաջացնում է, բայց ես հույս ունեմ, որ բոլորդ գիտեք, որ ես` ինքս, այդ բռնել-բաց թողնելու պրոցեսների հետ կապ չունեմ, իմ որոշման տիրույթում չեն»,-ասաց Փաշինյանը՝ հույս հայտնելով, որ Հայաստանում անկախ դատական համակարգ պետք է գոյություն ունենա:
«Այսօր մարդիկ ասում են՝ Մանվել Գրիգորյանին բաց են թողել, դրա համար ճանապարհը փակել ենք, այնպիսի տապավորություն է, որ իրենք բռնել, մենք էլ բաց ենք թողել: Այդ մեր կառավարության և իշխանության գործունեության արդյունքում են տեղի ունեցել այդ բացահայտումները, և ճանապարհներ փակելն ընդդեմ կառավարության է արվում»։
Ըստ Նիկոլ Փաշինյանի՝ այն, որ Մանվել Գրիգորյանի խափանման միջոցը փոխել են, չի նշանակում, որ մեղադրանքները վերացել են: «Ինձ համար էլ էր տհաճ, որ իմացա խափանման միջոցը փոխելու լուրը»,- ասաց նա:
Փաշինյանի դիտարկմամբ՝ որոշ նախկին կլանային ուժեր փորձում են այս պրոցեսն օգտագործել․
«Ասում են՝ լա՞վ էր, որ Նիկոլը ճամփա էր փակում, հիմա էլ մենք ենք փակում․ դուք չե՛ք փակելու, որովհետև դրա լիազորությունը չունեք և ժողովրդից էլ չեք ստացել այդ լիազորությունը, քանի որ ժողովուրդն իր իշխանությանն ընտրել է, և այդ իշխանության լիազորությունն է ապահովել այդ ճանապարհների անցանելիությունը»,- ասաց նա և նշեց, որ ճանապարհները կաթվածահար անողներն ուղիղ կառավարության դեմ են գործում և կոչ արեց այդ ճանապարհով չգնալ:
Նա նշեց, որ կարևոր է փաստաբաններին մեղադրվողների անձնական բարեկամներ կամ թշնամիներ չընկալելը: «Մենք վենդետա չենք ուզում, մենք ուզում ենք արդարադատություն, որի ամենակարևոր պայմանը նաև մեղադրյալի պաշտպանությունն է` պաշտպանի միջոցով»,-ասաց վարչապետը և ավելացրեց, որ որևէ մեկը չի կարող հին ձևերով գործել: