Մինչև ե՞րբ պետք է սխալների համար ներողություն խնդրեք. լա՛վ, բա ձեր մեջ մի «խելքը գլխին» մարդ չկա՞
Այնպիսի տպավորություն է, որ այսօրվա կառավարությունը լրիվ անգործության է մատնված ու անհեթեթ գրառումներով և լայվերով փորձում է լրացնել բացը: Ակամա հիշում ես ԿԳ նախկին նախարար Արմեն Աշոտյանին, ով շատ ակտիվ գրառումներ էր կատարում Ֆեյսբուքում և իր այդ ակտիվության համար անվերջ արժանանում կրթական համակարգի աշխատանքից դժգոհ հասարակության քննադատություններին ու հայհոյանքներին: Դրանք մոտավորապես այս համատեքստում էին՝ ինչքան պարապ եք, որ ամեն օր Ֆեյսբուքում եք, դուք գործ չունե՞ք անելու:
Հիմա արդեն հասել է ժամանակը, երբ այս հարցը պետք է ուղղել ո՛չ թե մեկ նախարարի, այլ ամբողջ կառավարարությանը, որի անդամ նախարար ու փոխնախարարներ ժ/պ-ները, գործ անելու փոխարեն՝ ամբողջ օրը ակտիվ գրառումներ են անում Ֆեյսբուքում:
Դեռ վերջերս էր ՀՀ տրանսպորտի, կապի և տեղեկատվական տեխնոլոգիաների նախարարի ժ/պ Արշակյան Հակոբն անհեթեթ ֆլեշմոբ սկսել ֆեյսբուքում (որն, ի դեպ, բացի ծաղրից, այլ արձագանքի չարժանացավ), հիմա էլ նրա տեղակալի ժ/պ-ն է փորձել անհեթեթ հումոր անել:
Արմեն Փամբուխչյանը Լարսի անցակետին ասմունք է ձոնել՝ «Հայր մեր» տերունական աղոթքի բառերը փոխելով:
.
Ու քանի որ , սա այլ բացատրություն չուներ, քան անարգանք՝ Հայ եկեղեցու ու մեր Տերունական աղոթքի նկատմամբ, ուստի ֆեյսբուքյան օգտատերերն աղմուկ բարձրացրին՝ քննադատելով կատարվածը: Փոխնախարարի ժ/պ-ի այս քայլը քննադատվեց նաև եկեղեցու սպասավորների կողմից:
Սրան հաջորդեց նոր կառավարության որդեգրած հաջորդ քայլը՝ մեղա գալը: Փամբուխչյանը որոշեց հեռացնել իր հիմար գրառումն ու «մեղայականով» հանդես գալ:
Ինչպես արդեն նկատեցինք, այս ոճը հատուկ է կառավարության նորաթուխ ղեկավարներին. անում ու ասում են ինչ կամենան, հետո սկսում ներողություն խնդրել ու սխալն ուղղելու փորձեր անել:
Այստեղ միայն մի բան ես մտածում. լա՛վ, հասկացանք՝ երիտասարդ եք. լա՛վ, հասկացանք՝ անփորձ եք, լա՛վ, թեկուզ հասկացանք, որ գործ անելու համար ձեզ ժամանակ է հարկավոր, նույնիսկ հասկացանք, որ սխալների վրա են սովորում, բայց մինչև ե՞րբ:
Պարոնա՛յք ղեկավարներ, եթե ձեր խելքն ընդհանրապես չի կտրում, բա դուք գոնե ձեր կողքին մի խելքը գլխին մարդ չունե՞ք, որ ձեր ձեռքին խփի ու ասի՝ «էդ քըխ ա, փուֆ ա, մի՛ արա»: Եթե պետք է անընդհատ անեք ու ներողություն խնդրեք, նորից սխալվեք ու ներողություն խնդրեք, է՛հ, ադպես նախորդներն էլ վատ չէին աշխատում՝ վիրավորում էին, հետո «կներեք, ժողովուրդ ջան» ասում: «Կներեք»-ով ժողովրդին 20 տարի հիմարացրին ժողովրդին ու երկիրը թալանեցին: Հիմա էլ նոր իշխանությո՞ւնն է փորձում «կներեք»-ով կերակրել ժողովրդին:
Մյուս կողմից էլ, եթե մի ղեկավար չի պատկերացնում ու չի հասկանում, որ ինքը քրիստոնյա է, որ կրոնը ծաղուծանակի չի կարելի ենթարկել, որ նման արժեքների վրա չի կարելի խաղարկել՝ էլ ի՞նչ պահանջես կամ սպասես նրանից:
Այնպես որ՝ վիրավորել մարդկանց, չգնահատել նրանց արժեքները, հետո ներողություն խնդրել դրա համար ու այդ սխալն անընդհատ թույլ տալ՝ պարզապես աններելի խեղկատակություն է...
Արմինե Մկրտումյան