Նոր Նորքի ոստիկան թաղապետը ռեփեր Միշոյի ՀՀԿ-ական մորը պաշտոն է տվել (լուսանկարներ)
«Նոր Հայաստանում» նոր պաշտոնյաների նշանակումները պատահական չեն լինում: Առավել ևս Երևանի իշխանության ձևավորման հարցում եղել են ո՛չ թե նոր նշանակումներ, այլ պարզապես տեղի են ունենում «պաշտոնափոխություններ». այսինքն՝ մեկին մի պաշտոնից տեղափոխում են մյուս պաշտոնի: Եվ ուշագրավն այն է, որ ՀՀԿ-ի օրոք պաշտոնավարած անձինք «նոր» իշխանության օրոք էլ կրկին պաշտոններ են ստանում, իսկ եթե ոչ հենց իրենք, ապա նրանց զարմիկը, բարեկամն ու ծանոթը: Այս մասին մամուլում արդեն լուրեր շրջանառվել են:
Մի խոսքով՝ ինչպես դասականը կասեր՝ սևերն ու սպիտակները մտել են միևնույն դաշտ ու խաղում են միասին:
NEWSPRESS.am-ի տեղեկություններով էլ՝ Նոր Նորք վարչական շրջանի ղեկավար Հայկ Մհրյանը ևս «նախկիններից» մնացած ժառանգություն է: Նա 2008 թվականին՝ նախկին նախագահ Սերժ Սարգսյանի պաշտոնավարման ժամանակ, նշանակվել է ՀՀ ոստիկանության ակադեմիայի ծառայության բաժնի պետի տեղակալ, իսկ հետո՝ ակադեմիայի պետի տեղակալ: Հայկ Մհրյանը ծառայության ընթացքում արժանացել է բազմաթիվ խրախուսանքների և ոստիկանությունում «գերազանց ծառայության համար» պարգևատրվել է կրծքանշանով և մեդալներով:
Իհարկե, չենք քննարկում Հայկ Մհրյանի ոստիկանական ծառայությունը, որն այն ժամանակ «խրախուսվել է» Սերժ Սարգսյանի ռեժիմի կողմից, քանի որ Մհրյանն ընդամենը հրամաններ է կատարել: Ամեն դեպքում, ոստիկանապետ Վալերիյ Օսիպյանի, նախկին փոխոստիկանապետ Հունան Պողոսյանի ու մյուսների նման, «հին» իշխանությանն «արժանապատվորեն» ծառայած ոստիկանն աննկատ չի մնացել:
Բայց որ ավելի ուշագրավ է, նա նաև իրեն շրջապատում է յուրայիններով: Մեր տեղեկություններով՝ նոր թաղապետն իրեն առաջին տեղակալ է նշանակել Նոր Նորքի ՀՀԿ կանանց խորհուրդի նախագահ Ալվինա Հարությունյանին: Ասել է թե՝ մի կնոջ, որ ժամանակին ՀՀԿ կլանին բավականին ծառայություններ է մատուցել ու աշխատել միայն նրանց օգտին (հատկապես ընտրությունների ժամանակ): Նա խրախուսվել է անմիջապես նախագահից:
Ալվինա Հարությունյանը հայտնի հայ ռեփեր Միշոյի (Միքայել Աբրահամյանի) մայրն է:
Մեր տեղեկություններով՝ տիկինը բարեկամական կապեր ունի նաև նախկին վարչապետ Կարեն Կարապետյանի հետ, ում պաշտոնավարման ժամանակ ստանձնել է Նոր Նորքի մշակույթի տան տնօրենի պաշտոնը: Ստացվում է, որ ինչպես նախկին իշխանության ժամանակ, նա այսօր էլ վայելում է «հեղափոխված» իշխանության հովանավորությունը:
Մի խոսքով՝ փոխվում են միայն դեմքերը. նախկին իշխանական ծառն արմատները խորացնում է իրեն սպասարկողների միջոցով, իսկ այդ ծառը ջրում են «նոր» իշխանության «նոր» պաշտոնյաները... կամ այսպես ասած՝ ՀՀԿ-ի ջրաղացին ջուր լցնողները լցնողները պաշտոններ են ստանում: