Ոստիկանությունը հաճույք չի ստանում քաղաքացուն գետնին պառկեցնելով կամ որևէ գործողություն անելով․ Օսիպյան
ՀՀ ոստիկանապետ Վալերիյ Օսիպյանին զարմացրեց լրագրողների հարցը, թե ի՞նչ «ռեյդեր» է իրականացնում ոստիկանությունը։
Լրագրողները հիշեցրին ոստիկանապետին, որ մեկ օր առաջ վարչապետ Նիկոլ Փաշինյանը հանձնարարեց «ռեյդ» անել և 2 ժամվա ընթացքում ասֆալտին պառկեցնել բոլոր օլիգարխների թիկնապահներին։
Հարցին, թե ինչո՞ւ ուշացրին հրամանի կատարումը երկու ժամից, Օսիպյանը պատասխանեց․ «Բայց ո՞վ ասաց՝ ուշացրինք, բայց դուք ի՞նչ գիտեք՝ մենք ինչ ենք արել, որ ուշացրինք։ Եվ ես ձեզ ասում եմ՝ վարչապետի ցանկացած կարգադրություն անմիջապես կատարում ենք»։
Ինչ վերաբերում է արդյունքներին, ապա Վալերի Օսիպյանը դրանց մասին չցանկացավ խոսել՝ գաղտնիությունից ելնելով։
Թե ինչ փուլում են գաղտնալսված հեռախոսազրույցի արդյունքները, և արդյոք հայտնաբերվել են այն տարածողները՝ Օսիպյանը չգիտի, տեղյակ չէ։
Կրկին անդրադառնալով «ռեյդեր»-ի հետ կապված թեմային` լրագրողները փորձեցին ճշտել՝ ինչպես են վարվում ոստիկանները՝ մարդկանց ասֆալտին պառկեցնելուց հետո։
-Պարո'ն Օսիպյան, ի՞նչ եք անում, պառկեցնում եք ասֆալտին, նկարում եք, ցուցադրում են, հետո բաց եք թողնում` գնա՞ն։
-Եթե ուշադիր լինեք, ոստիկանությունը մշտապես այդ գործողությունն արել է։ Ոստիկանությունը ո՛չ թե հաճույք է ստանում որևէ քաղաքացու գետնին պառկեցնելով, պատին դեմ տալով կամ որևէ գործողություն անելով, այլ ուղղակի այդ մարդկանց մոտ լինում է զենք, իսկ զինված քաղաքացին վտանգավոր է, և մենք պետք է հայտնաբերենք դա և պարզենք, թե օրինակա՞ն է զենքը, թե՞ ոչ և ինչ նպատակով է օգտագործվել։
-Պարոն Օսիպյան, կարծում եք՝ պարզելու համար, թե մարդու մոտ զե՞նք կա, թե՞ չկա, պարտադի՞ր է նրան գետնին փռելը։
-Իսկ եթե անձի մոտ զենք կա, ո՞նց մոտենանք։ ԱՄՆ-ում միայն երթևեկություն խախտելու համար մոտենում է ոստիկանը, ձեռքը դնում զենքին և ասում, որ վարորդը կատարի իր հրահանգները։
-Քանի՞ անգամ է վարչապետը Ձեզ հարթակից հրապարակավ հանրության մոտ հրահանգներ տվել, և արդյոք ոստիկանապետին նման ձևով հրահանգելու համար դա պատշա՞ճ ձև է։
-Կարծում եմ՝ վարչապետի հրահանգները բոլորն օրինական են։
-Արդյոք այս ամենը շոու չէ՞․ բոլորն այն կարծիքին են, որ թե՛ ձեր քայլերը, թե՛ վարչապետի հրահանգները, բոլորը շոու են և մամուլն այդպես էլ գրում է՝ «ռեալիթի» շոու։
-Շոուի ձևեր կան, բայց ես դրանցով չեմ առաջնորդվում։ Բոլորն ամեն կերպ փորձում են ցեխ շպրտել ոստիկանության վրա, բայց վստահեցնում եմ՝ ոստիկանությունը երբևիցե նման ձևով չի աշխատել, ինչպես այսօր է աշխատում։