Մենք Կաթողիկոս չունենք
Այսօր մի խումբ երիտասարդներ մուտք են գործել Մայր Աթոռ Սուրբ Էջմիածնի դիվանատուն՝ պահանջելով Գարեգին Բ Կաթողիկոսի հրաժարականը։
Ցուցարարները պահանջում էին, որ ցուցադրվի Մայր Աթոռում պահվող եզակի մասունք Սուրբ Գեղարդը, որը, ըստ իրենց տեղեկությունների, վաճառվել է: Ցուցարարների պնդումներին ի պատասխան՝ Մայր Աթոռ Սուրբ Էջմիածնի դիվանապետ Արշակ եպիսկոպոս Խաչատրյանն ասաց, որ այն չի վաճառվել, պարզապես մի կտորը նվիրվել է ռուս քաղաքապետի, այնուհետև մասունքի անվնաս լինելու մասին հայտարարություն տարածվեց: Մի խոսքով՝ մեկը մեկին հերքելուց չհասկացանք՝ հիմա ինչ վիճակում է այդքան արժեքավոր մասունքը, վնասվա՞ծ է այն, թե ̀ ոչ:
Լուրն իսկապես ցնցեց հավատացյալ ժողովրդին. մարդիկ, ովքեր պաշտում են եկեղեցին և եկեղեցու հետ կապված ամեն ինչ, հիասթափություն են ապրում, մի՞թե իր սպասավորներով հանդերձ այդքան եղկելի է այն եկեղեցին, որին իրենք կուրորեն հավատում են, մեղքերի թողություն խնդրում:
Ստացվում է՝ վերջին շրջանի բացահայտումներն ազդում են մարդկանց հոգեբանության վրա, չի մնում մի ոլորտ, որը սուրբ մնա: Այսպես ̀ Մանվել Գրիգորյանը ոտնատակ արեց բանակը, Արա Վարդանյանը՝ օգնության գաղափարը, Գարեգին Բ-ն էլ՝ եկեղեցին, դե, իսկ կառավարական և բիզնես ոլորտը Հայաստանում վաղուց անվանարկված էր: Թե ինչ կպարզվի հետո, թե ով որ հարցում ինչքանով է մեղավոր՝ հարցի մյուս կողմն է. էականն այն սկզբնական ինֆորմացիան է, որը կայծակնային արագությամբ լցվում է մարդկանց տներ:
Եկեղեցու շուրջ կատարվող այս լարված պրոցեսները պարզապես հեղինակազրկում են հոգևոր կառույցը և գուցե նաև աղանդավորների համար ճանապարհ բացում, բայց դա չի նշանակում, որ պետք է լռել անարդարության առաջ:
Եթե սուրբ մասունքը վնասված չլիներ, կարծում ենք, առանց հապաղելու եկեղեցին այն ի ցույց կդներ, գուցե նաև եպիսկոպոսական ժողով լիներ կամ այլ մասնագիտական կառույց, որը կկարողանար գնահատել մասունքի վնասվածության աստիճանը: Դա չեղավ: Ինչո՞ւ՝ որովհետև Կաթողիկոս ունենք, որը երբեք էլ իր հոտի կողքին չէ, և այսօր էլ իրեն վեր է դասում և տարածված տեղեկություններին անձամբ մեկնաբանություն տալ չի ցանկանում: Սա թերևս Կաթողիկոսի դեմ ընդվզման աճի պատճառներից մեկն է, այս պահվածքն է, որ հիմք է դարձել հասարակություն- եկեղեցի, Կաթողիկոս կապի վերացման:
Այս մթնոլորտում մենք չունենք Կաթողիկոս, որովհետև նրան չենք տեսնում, չենք լսում, չենք շփվում իր հետ, միայն գիտենք՝ կա մեկը, ով թանկարժեք նվերներ է տալիս և նույնքան թանկարժեք նվերներ էլ սիրում է ստանալ և բաժին չհանել իր հոտին: Ինչպես դա եղավ ազգային բարերար, ռուսաստանաբնակ ոսկերիչ և գործարար Գարուն Քոչարյանի նվերի հետ: Բոլորս ենք հիշում, որ Քոչարյանը Կաթողիկոսին նվիրեց մի գավազան, որը յուրահատուկ է եւ բաղկացած է 5 կգ ոսկուց, նաեւ թանկարժեք այլ քարերից: