Ինչպե՞ս են հայ մայրերը «նպաստում», որ իրենց երեխաները կարդան համացանցի էրոտիկ նյութերը․ պարզաբանում է հոգեբանը
Հայաստանում օր օրի ավելանում են կայքերը։ Նոր կայքերում, բլոգերում ու համացանցային էջերում կարելի է կարդալ բազմաժանր ու բազմապիսի նյութեր։ Կայքերից մի քանիսի համար կարևոր նշանակություն ունի լրագրողական պրոֆեսիոնալիզմը, նյութի հավաստիությունը, իսկ մի խումբ կայքերի համար էլ առաջնայինը դիտողականությունն է։ Բավական է մտնել Ֆեյսբուք սոցիալական հարթակը, թերթել լրահոսն ու ականատես կլինես զարհուրելի նյութերի, որոնց վերնագրերը կարդալով՝ արդեն իսկ պարզ է դառնում, թե հոդվածի ներսում ինչ է կատարվում։ Շատ ժամանակ օգտատերերը չեն հետևում նմանատիպ կայքերին ու էջերին, սակայն այդպիսի լուրերը հայտնվում են համացանցային էջի լրահոսում։
NEWSPRESS.am-ի հետ զրույցում հոգեբան Արմինե Սարգսյանն ընդգծեց, որ կայքերում տարածվող լուրերը շատ մեծ ազդեցություն են թողնում հասարակության ամենախոցելի խավի՝ երեխաների հոգեբանական աշխարհի վրա։
«Բավական է մտնել ֆեյսբուք սոցիալական ցանցը ու կտեսնես կայքերի ֆեյսբուքյան էջերի լուրերի գովազդները․ «Ինչպես տղան բռնաբարեց իր մորը», «Հայր ու աղջիկ լոգարանում սեքսով էին զբաղվում մինչ մայրը տանը չէր» և այլն։ Այս վերնագրերն ու խայտառակությունները զարհուրելի են նաև սեռապես ու հոգեպես առողջ մարդու համար։ Այդ լուրեր գրողներն ու տարածողները չեն կարող հասկանալ, թե այս ամենն ի՞նչ ազդեցություն է թողնում երեխաների, դեռահասների ու պատանիների հոգեկան աշխարհի վրա։ Իսկ հիմա 10 տարեկանից բարձր բոլոր երեխաներն ունեն սմարթֆոններ ու կարողանում են ազատ օգտվել համացանցից։ Իսկ այդ երեխաների ծնողներն անգամ չեն էլ պատկերացնում ու չգիտեն, թե ի՞նչ է դիտում, կարդում ու ուսումնասիրում իրենց երեխան»։
Հոգեբանն ընդգծեց, որ երիտասարդ հայ մայրերի անհետևողականության արդյունքում իրենց երեխաները հասունանալով՝ ձեռք էն բերում լուրջ խնդիրներ։
«Ես վիճակագրությանը չեմ տիրապետում, սակայն անզեն աչքով էլ երևում է, թե դեռահասների շրջանում որքան են ավելացել միասեռական տղաներն ու աղջիկները։ Շատերն այդ ամենը կապում են Հայաստանում եվրոպական ազատամիտ մտածելակերպի տարածման հետ։ Սակայն այդ ամենի հետ մեկտեղ մեծ կապ ունի նաև ծնողական անհետևողականությունը։ Փողոցում քայլում ես ու տեսնում 12 տարեկան աղջիկ երեխա, ով ունի սմարթֆոն։ Նա կարող է ազատ օգտվել համացանցից, կարող է խոսել ում հետ ցանկանում է։ Կարող է համացանցում նայել ցանկացած տիպի էրոտիկ տեսանյութ։ Իսկ հիմա հարց է առաջանում։ Արդյոք ի՞նչ է մտածում այդ երեխայի մայրը, կամ ինչպե՞ս է վստահում իր երեխային։ Շատ ժամանակ երեխան կարող է չկարդալ նմանատիպ լուրեր ու չփնտրել, բայց հիմա շատերիս ֆեյսբուքյան պատին բերում է լուրեր, որոնց էջերին մենք հավանություն չենք տվել։ Բավական է կարդալ այդ խայտառակությունների վերնագրերն ու արդեն ամեն ինչ պարզ է։ Իսկ երեխայի փխրուն ու գունագեղ աշխարհի համար հերիք է այդ զարհուրելի նյութի վերնագիրը և նա իր պատկերացումով այդ տեքստի տեսանյութային տարբերակը կվերարտադրի իր գլխուղեղում»։
Հոգեբան Ա․Սարգսյանը նշեց այն ճանապարհները, որոնց պետք է ուշադրություն դարձնել ու հետևել, հակառակ դեպքում իրավիճակն ապագայում ավելի վատ կլինի։
«Պետք է հետևել, թե կայքերում ի՞նչ նյութեր են հրապարակվում։ Պետք է սահմանել հատուկ կարգ։ Պետք է արգելել գումարով նյութերը գովազդելու մեխանիզմը։ Ես հասկանում եմ, որ դա շատ բարդ բան է, սակայն ամեն ինչ կախված է այդ բարդ ու իրենից մանրուք ներկայացնող իրողություններից։ Իսկ առաջին հերթին պետք է հետևողական լինեն ծնողները, ովքեր պետք է երեխաներին համացանցի գերի, ռոբոտներ ու այլասերվածներ չդարձնեն։ Ամեն ինչ պետք է վերահսկվի ու լինի չափի մեջ, հակառակ դեպքում մենք կունենանք անառողջ հասարակություն»։