«Վերևներից գալիս են ու Ֆիրդուսի բնակիչներին ահաբեկում, թե իբր Սերժ Սարգսյանի հրամանն են կատարում»․ Ի՞նչ է կատարվում Ֆիրդուսում

2017 թվականի ամռանը Ֆիրդուսի շուկայում տեղի ունեցած դեպքերն ու իրադարձությունները հուշում էին, որ Ֆիրդուսում կանգուն մնացած շենքերը սկսելու են ապամոնտաժել։

Այդ դեպքերից անցել է արդեն 7 ամիս, սակայն Ֆիրդուսում դեռ քարացած վիճակ է։ Այնտեղ վիճակը գրեթե նույնն է, ինչ Արամի փողոցում մնացած 3-4 ընտանիքների մոտ, որոնց չեն առաջարկում «մարդկային» պայմաններ։

NEWSPRESS.am-ը շրջել ու զրուցել է Ֆիրդուսի բնակիչների հետ։ Նրանցից ոմանք հասկանալի պատճառներով չցանկացան ներկայանալ, սակայն մեզ տեղեկացրին լուրեր, որոնք ապացուցեցին, թե ինչու Ֆիրդուսում ամեն ինչ դեռ նույնն է։

Փաստորեն, արդեն մի քանի ամիս է, ինչ Ֆիրդուսի բնակիչներին չեն կարողանում համոզել, որ լքեն իրենց բնակարանները։ Մեզ հետ զրույցում բնակիչներից մեկը հայտնեց, որ քառակուսի մետրի համար առաջարկում են 650 ԱՄՆ դոլար, սակայն դա շատ քիչ գումար է։

«Մենք ամբողջ կյանքում ապրել ենք այստեղ՝ կենտրոնում։ Մեր տների համար տալիս են 650 դոլար, սակայն եթե հիմա գնաք ու տեսնեք, թե կենտրոնում կառուցած իրենց տների համար ի՞նչ գումարներ են առաջարկում, ապա կհասկանաք, որ 650 դոլարը՝ քմ-ի համար շատ քիչ գումար է։ Մենք չենք լքի մեր տներն այնքան ժամանակ, քանի դեռ մեզ չեն առաջարկի բարձր գումար կամ լավ բնակարան»։

Բնակիչներից մեկն էլ նշեց, որ Ռայկոմում գտնվող նորակառույցում առաջարկում են բնակարան, սակայն իրենք չեն համաձայնում։

«Չենք համաձայնվում, քանի որ նորակառույց շենքում ապրելու համար պետք է վճարենք գումար։ Էնտեղ կա անվտանգություն ու էլի ծառայություններ։ Այդ ամենի համար պետք է վճարենք մոտ 30 հազար դրամ։ Ստացվում է, որ մենք մեր կենտրոնի տունը թողնում ենք, գնում քաղաքի ծայրամասն ու ապրում վարձով։ Վարձով է, քանի որ ամեն ամիս 30 հազար դրամ վճարելու ենք անտեղի»։

Բնակիչներից մի քանիսն էլ այնքան էին վրդովված, որ չցանկացան նույնիսկ զրուցել ու միայն հայտնեցին, որ ամեն անգամ գալիս են ու իրենց խաբում։

«Մի քանի անգամ եկել են ու ասել, թե իբր Սերժ Սարգսյանի հրամանն են կատարում ու գործում են իր անունից։ Տարիներ առաջ Սերժ Սարգսյանը մեզ օգնեց, որ մեր տները սեփականաշնորհենք, իսկ հիմա գալիս են, խաբում ու ասում, թե իբր նախագահի հրամանն ենք կատարում։ Այդպես մի քանի անգամ եկան ու տեսան, որ չենք համաձայնվում՝ գնացին»։

Բնակիչները փաստում են, որ քչերն են թողել իրենց բնակարաններն ու գնացել։ Իսկ նրանք, ովքեր թողել ու գնացել են, ապա միանշանակ զզվել են «վերևների մարդկանց» այցելություններից, դրա համար էլ գնացել են։ Ֆիրդուսում վիճակը դեռ քարացած է, սակայն բնակիչները վստահ են, որ «վերևներում» երբ ուզենան, ապա բնակիչներին կհանեն իրենց բնակարաններից։