Ով վերադարձրեց Թրամփին` Ռուսաստա՞նը, թե՞ ԱՄՆ֊ն. վերլուծաբան

Վերլուծաբան Հակոբ Բադալյան գրել է.

«Դեռեւս 2016 թվականին, երբ Հայաստանում մի, կարելի է ասել՝ «ողբ» էր սկսել այն առնչությամբ, թե Պուտինը Տրամպին դարձրեց ԱՄՆ նախագահ, մի քանի անգամ գրեցի, որ դա մեղմ ասած անարգանք է այն պետության հասցեին, որը կոչվում է ԱՄՆ եւ որը լինելով աշխարհաքաղաքականության ամենաերիտասարդ խաղացողը, դարձել է համաշխարհային հեգեմոն:

ԱՄՆ նախագահ «նշանակողը» ԱՄՆ խորքային պետությունն է, ավելի շուտ՝ այդ «խորքային պետության» տարբեր փիլիսոփայության եւ կոնցեպտի կրող շրջանակները, որոնց միմյանց միջեւ մրցակցությունը արտահայտվում է ընտրական գործընթացով:

Կրկնեմ, ասել, թե Պուտինը կամ որեւէ մեկը դրսից նշանակել է կամ «դարձրել» է ինչ որ մեկին ԱՄՆ նախագահ, դա առաջին հերթին անարգանք է թիվ մեկ գերտերության հասցեին: Այո, այդ գերտերության իշխանության համար պայքարում դրա մասնակից կողմերը քարոզչական նկատառումով կարող են միմյանց դեմ օգտագործել Պուտինի գործոնը: Միեւնույն ժամանակ, բնականաբար որեւէ երկիր էլ կփորձի իր հնարավորությունների չափով նպաստել գերտերության իշխանության ձեւավորման գործընթացի՝ իր համար նպաստավոր արդյունքի ձեւավորմանը: 

Բայց, կրկնեմ, ԱՄՆ նախագահ որեւէ մեկը դառնում է ԱՄՆ որոշումով, վճռորոշն ու բախտորոշշը այդ հարցում ամերիկյան իսթեբլիշմենտի տրամադրություններն են, ԱՄՆ հասարակության հետ նրանց աշխատանքի արդյունքը: 

Այդ իմաստով, այսօր էլ, եթե Տրամպը վերադառնում է Սպիտակ տուն, դա ԱՄՆ որոշումն է: Մեզ պետք է ոչ թե «ողբ» այդ որոշման առնչությամբ, այլ հասկանալ՝ ի՞նչպես ձեւավորեց այդ որոշումը, ի՞նչ է դա նշանակում, ինչպիսի՞ն են լինելու այդ որոշման քաղաքական «իմպլեմենտըացիայի» միջազգային դրսեւորումները»։