Պարոն Քյարամյան, Երևանի ավագանու անդամ Գրիգոր Հարությունյանից պարզեք, թե ինչպես է իմ և իր հեռախոսային խոսակցությունը հայտնվել երրորդ անձանց ձեռքում. Արիանա Հովսեփյան

Սույն գրությամբ դիմում եմ ՀՀ Քննչական կոմիտեի նախագահ Արգիշտի Քյարամյանին:

Տիկտոկյան հարթակում գործում է @skandal_news1 էջը, որը ոչ միայն իմ պատիվն ու արժանապատվությունը վիրավորող տեղեկություններ է հրապարակում, այլև խախտում մեկ այլ օրենք ևս` Անձնական տվյալների պաշտպանության մասին օրենքը:

Իմ նկատմամբ խուլիգանական արարք կատարելու մեջ մեղադրվող անձի մերձավոր շրջապատն ամիսներ շարունակ իրենց ֆեյսբուքյան էջերում երբեմն առանց իմ անունը հրապարակելու, երբեմն նաև հենց իմ անունը տալով, վարկաբեկող ու կեղծ տեղեկություններ էին հրապարակում` այդպիսով հոգեբանական բռնության ենթարկելով ինձ: 

Տրամաբանական շարունակությունը եղել է այն, որ հոգեբանական ճնշումների ներքո հայհոյախառն եմ խոսել նույն հանցավոր խմբի անդամ Գրիգոր Հարությունյանի հետ հեռախոսազանգի ընթացքում: 

Ինչպես պարզվել է հետագայում, վերջինս, փաստորեն, ոչ միայն ապօրինաբար ձայնագրել է ինձ, այլև սոցցանցերի միջոցով այդ ձայնագրությունը հրապարակվել է կեղծ էջի միջոցով:

Պարոն Քյարամյան,

Խնդրում և պահանջում եմ` ոչ միայն արգելափակել տիկտոկյան նշված էջը, այլև Երևանի ավագանու անդամ Գրիգոր Հարությունյանից պարզել, թե ինչպես է մեր հեռախոսային խոսակցությունը հայտնվել երրորդ անձանց ձեռքում, եթե իհարկե այդ էջը հենց ինքը չէ շահագործում:

Ակնկալում եմ, որ բոլոր մեղավորները կպատժվեն օրենքի ամբողջ խստությամբ:

Արիանա Հովսեփյան