Ընտանեկան միջավայրում հանդիպում է եղել Գագիկ Ծառուկյանի տանը, քաղաքական հարցեր չեն քննարկվել․ Բագրատ Սրբազան

Ընտանեկան միջավայրում հանդիպում է եղել Գագիկ Ծառուկյանի տանը:

Այս մասին լրագրողների հետ զրույցում ասաց «Տավուշը հանուն հայրենիքի» շարժման առաջնորդ Բագրատ Սրբազանը։

«Վաղուց «Ժպիտների քաղաք» հիմնադրամին մեծ աջակցություն է ցուցաբերել «Ծառուկյան» հիմնադրամը, բավականին մտերմություն ենք ունեցել նրա հետ։ Երկու, կամ երեք օր առաջ իր գրասենյակի միջոցով դիմել էինք նրան՝ իմանալով, որ մեր տարածաշրջանում տարբեր ծրագրեր է իրականացնում, հասկանալու, թե ինչ է հնարավոր անել մեր Տավուշի և Լոռիի շրջանում մարդկանց կարիքները հոգալու համար»,- պարզաբանեց նա։

Նա ասաց, որ իրենք մեկ օր առաջ նախապես գրասենյակի միջոցով խոսել էին այդ մասին, երեկոյան գնացել են այցելելու, հասկանալու, թե ինչ են ծրագրել՝ իրենք շատ հետաքրքիր կերպով են մոտենում խնդրին, ինչ-որ իմաստով՝ թիրախային։

Ճշտող հարցին՝ քաղաքական հարցեր քննարկվե՞լ են, նա արձագանքեց․

«Ընտանիքի անդամներն էին՝ թոռ զավակ, հարս, եթե խոսենք էլ լավ կանենք, բայց ասացի չի եղել նման բան, ընտանեկան է եղել, մեծ ընտանեկան հանդիպում էր»։

Նա նշեց, որ այսօր առավոտ արդեն պետք է մեկնեին կարիքների գնահատման համար, ուղղակի տեղում հասկանալու՝ ինչ է կատարվում։