Պետք է հիշենք մեր հայրենիքի ամեն մի սանտիմետր հողի համար մեր հերոսների թափած արյունը. Գագիկ Ծառուկյանի ուղերձը

Բարգավաճ Հայաստան կուսակցության նախագահ Գագիկ Ծառուկյանը շնորհավորել է Առաջին Հանրապետության տոնի առիթով։ Նա մասնավորապես գրել է.

Սիրելի՛ հայրենակիցներ, քույրեր և եղբայրներ,
Ջերմորեն շնորհավորում եմ Հանրապետության տոնի առթիվ:

Մեր պետությունն այսօր դժվար ժամանակներ է ապրում: Հայրենիքի սահմաններն անխախտ պահելը, մեր հասարակության մեջ հաշտության ու համերաշխության մթնոլորտի ձևավորումը դարձել է յուրաքանչյուր արժանապատիվ հայի առաքելությունը: Առաջին Հանրապետության ձևավորումը դրել է մեր այսօրվա պետության հիմքերը, և մեր անցյալի ժառանգության զգացումը, հայկական պետության ժառանգականությունը մեզ համար կարևորագույն խարիսխ են այսօրվա անկայուն և փոփոխական աշխարհում։ Պատմական հիշողությունը մեր միասնական հարստությունն է, որը պետք է սրբորեն պահենք ու փոխանցենք սերունդներին։

Մենք պետք է հիշենք մեր հայրենիքի ամեն մի սանտիմետր հողի համար մեր հերոսների թափած արյունն ու ձգտենք մեր երեխաներին խաղաղ, զարգացող պետություն ժառանգել: Այս գործընթացում ամենակարևորը մեր կամքն է, մեր հավատն ու միասնությունը, ազգային հաշտության կայացումն ու ատելության մթնոլորտի վերացումը: Հակառակ պարագայում մենք կարող ենք չափից դուրս թանկ գին վճարել: Մենք արդեն իսկ վճարել ենք։

Ես հավատում եմ, որ ուժեղ պետություն ու միասնական հայկական աշխարհ ունենալու մեր երազանքն իրականություն է դառնալու:
 
Աստված պահապա՛ն մեզ բոլորիս…