Նարեկ Մալյանը դատապարտվեց 1 տարվա ազատազրկման, անազատության մեջ կմնա 5 ամիս 7 օր
Հասարակական-քաղաքական գործիչ Նարեկ Մալյանը դատապարտվեց 1 տարի ժամկետով ազատազրկման։
Երևան քաղաքի առաջին ատյանի քրեական դատարանի դատավոր Սուսաննա Գզոգյանը հրապարակեց վճիռը․
«Մեղադրյալ Նարեկ Մալյանին մեղավոր ճանաչել ՀՀ քրեական օրենսգրքի 329-րդ հոդված 2-րդ մասի 3-րդ կետով և նրա նկատմամբ պատիժ նշանակել ազատազրկում 1 տարի ժամկետով։ ՀՀ քրեական օրենսգրքի 79-րդ հոդվածի 3-րդ մասի հիման վրա հաշվակցել Նարեկ Մալյանի անազատության մեջ գտնվելու ժամանակահատվածը 2023 թվականի սեպտեմբերի 20-ից մինչրև 2024 թվականի ապրիլի 12-ը, և նրա նկատմամբ վերջնական պատիժ սահմանել ազատազրկում 5 ամիս 7 օր ժամկետով։ Մեղադրյալ Նարեկ Մալյանից հօգուտ ՀՀ հօգուտ պետական բյուջե բռնագանձել դատահոգեբանական, դատալեզվաբանական փորձաքննության և լրացուցիչ փորձաքննության համար ծախսված 108,000 ՀՀ դրամը և 198,000 ՀՀ դրամը՝ որպես դատական ծախս։ Մեղադրյալ Նարեկ Մալյանի նկատմամաբ ընտրված խափանման միջոցը՝ կալանքը, թողնել անփոփոխ մինչև դատական վճռի օրինական ուժի մեջ մտնելը։ Դատավճիռը կարող է բողոքարկվել ՀՀ վերաքննիչ քրեական դատարան ստանալու օրվանից հետո մեկամսյա ժամկետում»։
Հիշեցնենք, որ 329-րդ հոդվածը սահմանում է՝ «Անձի կամ անձանց խմբի նկատմամբ քաղաքական հայացքներով պայմանավորված ատելություն, անհանդուրժողականություն կամ թշնամանք քարոզելուն ուղղված հրապարակային խոսքը»: Սահմանված պատիժը՝ 1-4 տարի է։
Մեղադրող կողմը պահանջել էր 3 տարի 3 ամիս ազատազրկում։ Մալյանի պաշտպան Ռուբեն Մելիքյանն ավելի վաղ լրագրողների հետ զրույցում դատախազության կողմից մաթեմատիկական խնդիրներ էր տեսել 1-4 տարին կիսել չկարողանալու մեջ։