Պապան 2020թ. պատերազմից հետո երբեք չէր ասում՝ լավ եմ, ասում էր՝ պինդ եմ․ իսկ երբ ասում էին՝ գոնե մի քիչ հանգստացի, ասում էր՝ գերեզմանում կհանգստանամ․ Գագիկ Գինոսյանի դուստր (տեսանյութ)

Կյանքում, միակ մարդը, ում հետ երբեք շփվելիս չեմ կաշկանդվել՝ հայրս էր։ Այս մասին լրագրողների հետ զրույցում ասաց «Կարին» ավանդական երգի-պարի խմբի հիմնադիր և գեղարվեստական ղեկավար, Հայաստանի մշակույթի վաստակավոր գործիչ, Արցախյան պատերազմի մասնակից Գագիկ Գինոսյանի դուստրը՝ Ծովինար Գինոսյանը։

«Ինչ ուզում էր լիներ՝ հայրս միշտ ինձ հասկանում էր, նա միշտ մեդալի 2 կողմն էր նայում»,- ասաց նա։

 Ծովինար Գինոսյանը նկատում է, որ կյանքում իր հորը ոչինչ այպես չի վշտացրել, ինչպես պատերազմը։ Դա նրա վրա անհետք չի մնացել։

«Պապան 2020թ. պատերազմից հետո չեմ հիշում, որ ասեր լավ եմ, երբ հարցնում էին՝ ո՞նց ես, միշտ ասում էր՝ պինդ եմ, երբեք չէր ասում՝ լավ եմ»,- ասաց  Ծովինար Գինոսյանը։

Նա պատմում է, որ հայրը միշտ շատ ծանրաբեռնված է աշխատել։ Եղել են դեպքեր, երբ նրա բացակայության ժամանակ 3 հոգով անգամ չեն կարողացել լիարժեք փոխարինել վարպետին ու անել նրա գործը։ 

«Երբ ասում էին՝ մի քիչ հանգստացի, ասում էր՝ գերեզմանում կհանգստանամ»,- պատմեց վարպետի դուստրը։