Երբ համեմատում ենք տրանսպորտի գներն այլ երկրների հետ, պետք է համեմատել նաև բնակչության եկամուտներն ու միջին կենսամակարդակները․ Հակոբ Կարապետյան
Նախկին քաղապետ Հայկ Մարությանի նախկին խոսնակ Հակոբ Կարապետյանն անդրադարձել է տրանսպորտի գների թանկացմանը։
Նա մասնավորապես գրել է․
«Երբ համեմատում ենք Երեւանում առաջարկվող տրանսպորտի գները եվրոպական կամ ամերիկյան որեւէ քաղաքում գործող գների հետ, բացարձակ թվերից բացի պետք է համեմատենք նախ եւ առաջ բնակչության եկամուտներն ու միջին կենսամակարդակերը։
Այսպես, ԱՄՆ Արիզոնա նահանգի Ֆինիքս քաղաքի տրանսպորտից (ավտոբուս+տրամվայ) 1 տարի ԱՆՍԱՀՄԱՆԱՓԱԿ օգտվելու քարտը գնել եմ 150 դոլարով կամ մոտ 61 հազար դրամով։
Սա գրեթե կրկնակի էժան է Երևանում առաջարկվող փոփոխությունների գնից, համաձայն որի, պետք է տարեկան վճարել 110 հազար դրամ։ Ընդ որում, Երեւանում առաջարկվող փոփոխությամբ տարեկան քարտ գնելիս կարող ես երթեւեկել 1000 անգամ միայն։ Այսինքն, եթե էնպես լինի, որ օրական երկու անգամից ավելի ավտոբուս նստես, վճարածդ 110 հազարը մինչեւ տարվա վերջ չի հերիքելու, ստիպված ես լինելու լրացուցիչ վճարել։ Այսպիսով, ԱՄՆ մեծությամբ 5-րդ քաղաքի (բնակչությունը՝ 1.7 մլն) տրանսպորտը բացարձակ թվերով ավելի քան կրկնակի էժան կլինի, քան Երևանում։
Բայց ամենակարևոր ցուցանիշը բնակչության միջին եկամուտներն են ու կենսամակարդակը։ Այս առումով եկամուտներ/գներ խզումը անգամներով ավելանում է։
Որովհետև, ՈՒՇԱԴԻՐ, միջին ամսական եկամուտը Հայաստանում կազմում է 670 դոլար, մինչդեռ Արիզոնայում միջին ամսական եկամուտը կազմում է $2,600` շուրջ չորս անգամ ավելի, քան Հայաստանում։ Պարզ ասած՝ Արիզոնայի ամերիկացիներից 4 անգամ ավելի վատ ապրող երևանցիները կրկնակի թանկ են վճարելու տրանսպորտից օգտվելու համար։
Հետևությունները թողնում եմ ձեզ»: