Պարոն Սուքիասյան, հիմա կա ինտերնետ՝ ո՞նց Արցախի ժողովուրդը ցեղասպանվեց․ իսկ կարո՞ղ է իշխանության հանցավոր մեղսակցության պատճառն էլ կա Արցախի հայաթափման հարցում․ Արծվիկ Մինասյան (տեսանյութ)
Պատգամավոր Խաչատուր Սուքիասյանն ինտերնետն է վկայակոչում, թե՝ եթե 100 տարի առաջ ինտերնետ լիներ՝ չէինք ցեղասպանվի։ Հիմա կա ինտերնետ՝ ո՞նց Արցախի ժողովուրդը ցեղասպանվեց, ո՞նց տեղահանվեց։ Իսկ կարո՞ղ է մի հատ նաև հասկանաք, որ օրվա իշխանության անգործության, հանցավոր մեղսակցության պատճառն էլ կա Արցախի հայաթափման և պարտությունների հարցում։ ԱԺ-ում իր ելույթի ժամանակ ասաց «Հայաստան» խմբակցության քարտուղար Արծվիկ Մինասյանը՝ արձագանքելով ՔՊ-ականների կողմից «Դաշնակցությանն» ուղղված քննադատություններին։
Անդրադառնալով Փաշինյանի հայտարարություններին՝ նա հայտնեց, որ Միջազգային պայմանագրերի մասին Վիեննայի կոնվենցիան բացարձակապես հնարավորություն չի տալիս պետական օրենսդրությունը ոտնակոխ անելով և խախտելով` խորհրդարանում մեծամասնության մասնակցությամբ անցկացնել միջազգային փաստաթուղթ։
«Դա է պատճառը, որ ՀՀ Սահմանադրությունն իր արգելող նորմով 116-րդ հոդվածի 3-րդ մասով, որտեղ ասվում է, որ միջազգային պայմանագրերը, որոնք պարունակում են Սահմանադրությանը հակասող դրույքներ, չեն կարող վավերացվել, սա անհաղթահարելի է»,- հայտարարեց Արծվիկ Մինասյանը։
Ինչ վերաբերում է Սահմանադրության փոփոխության հարցին, ապա Մինասյանը նկատեց, որ եթե անգամ իշխանությունը ցանկանում է բարելավել Սահմանադրությունը, ու թշնամին կողմ է այդ փոփոխությանը, ուրեմն դա լավ միտք չի կարող լինել և իշխանությունը պետք է հետ կանգնի իր որոշումից։
«Նիկոլ Փաշինյանը հայտարարում և ասում է, որ համաձայնեցված դրույթ ունենք, ա'յ հենց այստեղ է մեխը։ Դուք չեք կարող նման համաձայնեցված դրույթ ունենալ, անգամ եթե կլինեք Ալիևի հետ թեյ խմելուց, որը կհակասի ՀՀ Մայր օրենքին»,- հայտարարեց Արծվիկ Մինասյանը՝ նշելով, որ Սահմանադրության փոփոխության հարցը պետք է հանրաքվեով լուծվի։