Ալիևը մտադիր է Արցախը բնակեցնել իբրև նախկին փախստականներով

Ադրբեջանի իշխանությունները նախատեսում են մինչև 2026 թվականի վերջը Արցախում  բնակեցնել ավելի քան 140 հազար իբրև նախկին փախստականների։ Ինչպես հայտնում է  Gazeta.ru-ն` այս մասին հայտարարել է հանրապետության նախագահ Իլհամ Ալիևը Euronews հեռուստաալիքին տված հարցազրույցում։

«Անհրաժեշտ է որքան հնարավոր է շուտ վերաբնակեցնել «նախկին» փախստականներին։ Մինչև 2026 թվականի վերջ մենք նախատեսում ենք վերաբնակեցնել ավելի քան 140 հազար մարդու»,- ասել է նա։

Ալիևը նշել է, որ այսօր Բաքվի վերահսկողության տակ անցած շրջաններում էական ներդրումների կարիք կա ենթակառուցվածքային, բնակարանային նախագծերում և սոցիալական ենթակառուցվածքային նախագծերում։

«Այս տարածքը մեծ ներուժ ունի գյուղատնտեսության, հիդրոէներգետիկայի, արևային և հողմային էներգիայի, զբոսաշրջության ոլորտներում։ Սա կլինի պետական ​​ներդրումային ծրագրի հիմնական ուղղությունը»,- հավելել է Ադրբեջանի ղեկավարը։

Մինչ այս Իլհամ Ալիևը հայտարարել էր, որ Ադրբեջանը Լեռնային Ղարաբաղում իր գործողություններով ցույց է տվել, թե ինչպես կարելի է խաղաղություն հաստատել ռազմական ուժի օգնությամբ։