Փաստեր ու ապացույցներ` ՀՊՏՀ ռեկտորի` գողություն կատարած լինելու մասին. նաև հետախուզում է հայտարարված. Արիանա Հովսեփյան (լուսանկարներ)
Ինչպես արդեն շատերդ տեղյակ եք, տեղեկություն էի հրապարակել այն մասին, որ Հայաստանի պետական տնտեսագիտական համալսարանի ռեկտոր Դիանա Գալոյանն ԱՄՆ-ում մեղադրվում է գողություն կատարելու համար:
Թե ինչու է այս աղջիկը հայտնվել իմ ուշադրության կենտրոնում` շատ պարզ է. այս տիկնոջ մայրը ֆեյսբուքյան էջում իր մեջ կուտակված թույնը թափել էր ո'չ ավել, ո'չ պակաս, տեղական և հարևան թշնամիների ձեռքով անօթևան մնացած արցախցիների նկատմամբ: Արցախցիները` չգիտեմ ինչպես, բայց ես դա կուլ տալ չէի կարող:
Փոքրիկ ուսումնասիրություն սկսելով` առաջին իսկ պահին բացահայտեցի այդ կնոջ դստեր հետ կապված հենց այս դրվագը, բայց դեռ չէի հրապարակում այն պարզ պատճառով, որ նման բաները պետք է ձեռքի տակ փաստերով ունենալ:
Նախ փոքրիկ հիշեցում անեմ այն մասին, որ Գալոյան Դիանան ռեկտորի աթոռին հասավ աղմուկ-աղաղակով. նրա դոկտորական աշխատանքում, ըստ ուսանողների, հետագայում՝ նաև ԲՈԿ նախկին նախագահ Սմբատ Գոգյանի, առկա էին ակնհայտ թարգմանություններ և արտագրություններ: Ասել է թե` Գալոյանը մեղադրվում էր գրագողության մեջ: Եվ այնուամենայնիվ նրան ներվեց այդ գրագողությունը, և ի վերջո կառավարությունը հաստատեց ՀՊՏՀ ռեկտորի ընտրության արդյունքները:
Հիմա էլ պարզվում է, որ գողությունը ոչ թե միայն գրերին է վերաբերում, այլև ուղիղ իմաստ ունի` խանութից հագուստ գողանալուն: Ու դեռ մի բան էլ հենց նյութական գողությունը կատարվել է ավելի վաղ, քան գրագողությունը: Հանցագործությունը տեղի է ունեցել դեռևս 2017 թվականին, երբ Գալոյանը դեռ դասախոս էր:
Ինչևէ. այս լուրը հրապարակելուց հետո, շշուկներ են հասնում, որ Դիանան, առանց փոքր-ինչ ամոթի, իր շրջապատում աջուձախ հայտարարում է, թե սուտ տեղեկություններ եմ հրապարակել իր մասին: Մինչդեռ, երբ լրատվամիջոցները պարզաբանում են խնդրել նրանից, պարզվել է, որ բազմազբաղ տիկինը «չի ցանկանում այդ թեմայի շուրջ մեկնաբանություն տալ»: Պարզ է, չէ՞, որ չի կարելի հերքել ԱՄՆ դատարանի որոշումները, դեռ շրջապատում հույսը կարելի է դնել մարդկանց նաիվության վրա, բայց լայն զանգվածները հո խոտ չե՞ն ուտում:
Հրապարակմանը կից ներկայացնելու եմ լուսանկարներ` դատավարության մասին պատմող, որտեղ ընթերցողը տեսնելու է և' գումարի չափը, որն արժեցել է հայտնի Neiman Marcus-ից գողացած հագուստը, և' այլ հետաքրքիր փաստեր, անուններ, ամսաթվեր ու ստորագրություններ:
Բայց, մինչ այդ, ևս մեկ անակնկալ նորություն Դիանային սրբի լուսաապսակով պատկերացնողների համար. 3 օր կալանքի տակ անցկացնելուց հետո, Դիանայի փաստաբանին հաջողվել է դուրս բերել նրան կալանքից, բայց անշնորհակալ աղջիկը ճողոպրել է ԱՄՆ-ից, այն ժամանակ, երբ պետք է մասնակցեր դատավարությանը: ԱՄՆ-ի դատարանը հայտարարել է հետախուզում: Ինչ վերաբերում է փաստաբանին, ապա, Գալոյանը նրան հասանելիք աշխատավարձն է «քցել»` 2000 դոլար: Փաստաբանն էլ, ո'չ ավել, ո'չ պակաս, եղել է Դիանայի մոր` Զոյա Թադևոսյանի ընկերուհու որդին:
Ի դեպ, Գալոյանը դատարանում խնդիր է ունեցել ոչ միայն ԱՄՆ-ում:
Այժմ էլ, երբ թիկնել է Տնտեսագիտականի ռեկտորի պաշտոնին, աջուձախ անտանելի պայմաններ է ստեղծում, որ բազմափորձ դասախոսները թողնեն-հեռանան: Օրինակ` Տնտեսագիտության տեսության ամբիոնի վարիչ Ֆիրուզա Մայիլյանին Գալոյանը «խիստ նկատողություն» է տվել, իսկ երբ վերջինս բողոքարկել է դատարանում, Դիանան ստիպված է եղել չեղարկել «խիստ նկատողությունը»:
ՀՊՏՀ քոլեջի տնօրեն Գոհար Բուլանիկյանի հետ կապված պատմությունը ևս հանրությունը հնարավոր է` հիշում է, երբ Բուլանիկյանը ենթարկվում էր հետապնդումների և, ի վերջո, տեղի տալով, ազատման դիմում գրեց, չնայած տիկնոջ հայցը դատարան ևս իրենն արել էր, և ստացված նկատողությունը չեղարկվել էր:
Էդգար Ղազարյանը ևս ինչ-որ հրաշքով դադարեց ՀՊՏՀ-ում դասավանդելուց:
Նման մի պատմություն էլ տեղի ունեցավ «Մակրոէկոնոմիկայի» ամբիոնի դոցենտ Արփենիկ Մուրադյանի հետ, երբ վերջինիս ժամեր չտվեցին` զուտ վրեժխնդրությունից ելնելով. տիկինը համարվում էր նախկին ռեկտոր Ռուբեն Հայրապետյանի համախոհը:
Այս բոլոր մեծ ու փոքր «չարագործությունները» Գալոյան Դիանան անում է ՀԱԿ-ական մոր գաղափարակից, Հայաստանում՝ նախագահ, իսկ ՀՊՏՀ-ում՝ խորհրդի նախագահ աշխատող, թաղումների ժամանակ լուսանկարվող Վահագն Խաչատուրյանի բարձր, բայց ճղճիմ հովանու ներքո:
Գալոյանի այլ «հերոսությունների» մասին` առաջիկայում:
Արիանա Հովսեփյան