ՔՊ-ն մերժելով Լաչինի միջանցքի հետ կապված նախագիծը, հրաժարվեց 2021թ.-ի ընտրությունների ժամանակ ներկայացրած իր նախընտրական ծրագրից. Թևանյան
Քիչ առաջ մենք ականատես եղանք հերթական ստի ու խաբեության դրսևորմանը: Մասնավորապես՝ «Քաղաքացիական պայմանագիր» խմբակցությունը մերժեց Լաչինի միջանցքի հետ կապված ԱԺ հայտարարության նախագծի մեր տարբերակը, որով փաստացի հրաժարվեց 2021թ.-ի խորհրդարանական ընտրությունների ժամանակ ներկայացրած իր նախընտրական ծրագրից: Այս մասին Ազգային ժողովում լրագրողների հետ զրույցի ժամանակ ասաց ԱԺ «Հայաստան» խմբակցության պատգամավոր Անդրանիկ Թևանյանը:
Ըստ Թևանյանի՝ աա նշանակում է, որ ՔՊ-ն ամբողջությամբ տեղավորվել է ադրբեջանական օրակարգի մեջ: Թևանյանը մի քանի հանգամանք ներկայացրեց. «Ալիևը երբեք չի թաքցրել իր նկրտումներն Արցախի ու Հայաստանի նկատմամբ: Դրա հետ կապված՝ կան մի քանի հանգամանքներ: Առաջինը՝ Պրահայում, ըստ էության, տեղի է ունեցել համաձայնություն Փաշինյանի և Ալիևի միջև առ այն, որ Արցախը կարող է դիտարկվել Ադրբեջանի կազմում: Երկրորդը՝ հայ-ռուսական հարաբերությունների հետ կապված, որ դրանք հերթական լարվածության, և կարելի է ասել, փչացման փուլն են ապրում: Եվ դա նույնպես թև է տալիս Ալիևին: Եվ երրորդ՝ ի տարբերություն Վրաստանի իշխանությունների՝ ՀՀ իշխանությունները Հայաստանը դարձրել են աշխարհաքաղաքական բախման թատերաբեմ: Արևմուտք-Ռուսաստան հակամարտությունը մեր երկիրը վերածել է մանրադրամի: Ահա այս 3 հանգամանքներն են, որ Ալիևին հնարավորություն են տալիս դիմել ագրեսիվ, սադրիչ և հանցավոր գործողությունների»:
Պատգամավորը կարծում է, որ իրավիճակի փոփոխության համար անհրաժեշտ է Հայաստանի քաղաքականության փոփոխություն, իսկ ՀՀ-ի քաղաքականության փոփոխությունը ենթադրում է այլ իշխանություններ: