Իմ և Արսեն Բաբայանի վերլուծությունն արտահայտում է բացառապես մեր մասնագիտական կարծիքը և չի կարող կաշկանդել որևէ մեկին․ Սոս Հակոբյան
Փաստաբան Սոս Հակոբյանը գրում է.
«Ազգային ժողովում գնացող քննարկման մասին մեկ դիտարկում մասնագիտական դաշտում.
1. «Հանրային ծառայության մասին» օրենքը կամ այլ օրենքները որևէ բացառություն չի նախատեսում անձի կողմից անհատ ձեռնարկատերի կարգավիճակ ունենալու պարագայում վարքագիծը խախտում չհամարելու համար։
2. Իմ և Արսեն Բաբայանի վերլուծության մեջ նշված բացառությունը (հարկային մարմին ուղարկված դիմում գործունեությունը դադարեցնելու վերաբերյալ) իրավաբանական վերլուծություն է, որը արտահայտում է բացառապես մեր մասնագիտական կարծիքը և չի կարող կաշկանդել որևէ մեկին։
3. Այս հարցի վերաբերյալ օրենսդրության պարտադիր մեկնաբանման իրավունք ունի բացառապես Սահմանադրական դատարանը, ինչի համար էլ նորմալ պայմաններում ԱԺ-ն կուղարկեր իր դիմումը Սահմանադրական դատարան։
4. Վերլուծության մեջ առկա ակտիվ գործողություններով ձեռնարկատիրական գործունեության զբաղվելուց հրաժարվելու՝ մեր կողմից առաջ քաշված թեզը կարող է կյանքի իրավունք ունենալ բացառապես այն պարագայում, եթե Բարձր դատարանի դատավորը փաստացի չիրականացներ իր ԱՁ-ի հիմնական գործունեությունը, այնինչ՝
Սեդա Սաֆարյանը դեկտեմբերի 28-ին ստորագրել է որպես ներկայացուցիչ (փաստաբան) դատարան ուղարկվող դիմումի տակ, իրացրել է իրեն փաստաբանի արտոնագրով տրված լիազորությունները, որը խախտումի ձևական որակելու տարբերակը բացառվում է։
5. Ի միջայլոց, Սեդա Սաֆարյանը բովանդակային խախտման գործողությունը կատարել է՝ փաստաբանությամբ է զբաղվել (իր ԱՁ-ն հենց դրա համար է գրանցված եղել) նույնիսկ իր կողմից (իրենց հրապարակային պնդումների համաձայն) Փաստաբաններին պալատին ուղարկված դիմումի մեջ նշված դեկտեմբերի 8-ից հետո։
Հ.Գ. որպես քաղաքացի բարձր եմ գնահատում պատգամավոր Արծվիկ Մինասյանի ջանքերը շատ մանրամասն և պրոֆեսիոնալ կերպով պատասխանելու բոլոր ոչ պրոֆեսիոնալ և թեման շեղելու նպատակ ունեցող հարցադդրումներին»։