Մենք այդպես էլ չսովորեցինք ապրել զոհվածների ծնողների, պատերազի մասնակիցների և պատերազմում հաշմանդամություն ստացողների հետ․ Նազարյանը նախագիծ է ներկայացրել

ՀՀ ԱԺ պաշտպանության և անվտանգության հարցերի մշտական հանձնաժողովի հերթական նիստի ժամանակ ԱԺ «Հայաստան» դաշինքի անդամ Գեղամ Նազարյանը ներկայացրեց «Հայրենիքի պաշտպանության համար զոհված զինծառայողի ընտանիքի անդամների երաշխիքների մասին օրենքի նախագիծը»։

Նազարյանը շեշտեց, որ «Հայաստան» խմբակցության կողմից ներկայացվող օրենքի նախագիծն ամենաքիչն ու նվազագույնն է, ինչ պետությունը պետք է անի։ Այս նախագծի վրա աշխատանքները սկսվել են զոհվածների ընտանիքների հետ շփումներից, առաջարկները, խնդիրները լսելուց, համադրելուց հետո։ Ուստի, Նազարյանը վստահորեն կարող է պնդել, որ այս նախագիծը ոչ թե ինքը կամ «Հայաստան» խմբակցությունն է ներկայացնում, այլ մի մեծ համայնք՝ նահատակ տղերքի ընտանիքները։ 

«Նպատակը մեկն է՝ օգնել, որ մեր հանրությունը լինի առողջ։ Այո՛, մեր հանրությանն առողջությանն ուղղված քայլ է, ապա նոր նահատակ տղերքի ընտանիքներին աջակցելուն ուղղված գործողություն։ Ցավով եմ նշում, բայց մեր հանրությունը, մեր երկիրը, մեր պետությունն այդպես էլ չսովորեցին, չհասկացան, թե ինչպես պետք է մեկ տարածքում, մեկ հարթության մեջ ապրել նահատակների ընտանիքների հետ։ Այս նախագիծը զոհվածների ընտանիքի անդամներին վերաբերող է, բայց մենք այդպես էլ չսովորեցինք ապրել պատերազմի մասնակիցների հետ, որոնք մեր կողքին են, չսովորեցինք ապրել պատերազմում հաշմանդամություն ստացողների կողքին։ Մենք դեռ երկար ճանապարհ պետք է անցնենք սովորելու համար, և այստեղ մեծ դեր ունի պետությունը, իշխանությունը»,- նշեց Նազարյանը։