ՀԷՑ-ի տնօրենը ժողովրդից թալանած փողերով ֆուռով Range Rover-ներ է բերում Հայաստան, որ թարմացնի հարազատների ավտոպարկը

NEWSPRESS.am-ը խոստացել էր «ջրի երես հանել» ՀԷՑ-ի (Հայաստանի էլեկտրական ցանցեր) ղեկավար կազմի անօրինականություններն ու պատմել, թե ինչպես են թալանում շարքային սպառողներին։

Սկզբի համար հիշեցնենք մեր ընթերցողներին (թեև դժվար թե որևէ մեկը դա մոռանա), որ ամեն անգամ տարեվերջին կառավարությունը «նվեր» է անում իր քաղաքացիներին՝ բարձրացնելով կոմունալ վարձավճարները (այդ թվում նաև՝ հոսանքի սակագինը, որը եկող տարի կթանկանա ևս 5 դրամով):

Հոսանքի հետ կապված թալանը հազիվ թե որևէ մեկը զգացած չլինի։ Այս թալանը տեղի է ունենում անմիջապես «վերևների» գիտությամբ ու նրանց «թեթև ձեռքով»․ դե, ինչպես ասում են, ձուկը գլխից է հոտում, բայց սկսենք «ներքևներից» ու հասկանանք, թե ովքեր են այն մարդիկ, ովքեր ջանասիրաբար ու ամենայն «պատասխանատվությամբ» լծվել են   շարքային քաղաքացիների թալանի գործին․․․

Եվ այսպես, մեր այս հրապարակման «հերոսը» ՀԷՑ Տնօրենների խորհրդի նախագահ Կարեն Դարբինյանն է․․․

Այս անձնավորությունն այն մարդկանցից է, ով թաց տեղ չի պառկում ու «անտեր» ման չի գալիս։ Համենայնդեպս, նա սկսում է խառնվել, երբ «անտեր» է մնում։ 

Նրան իշխանությունների հետ ջերմ հարաբերություններ ու «տեր» ունենալը հարկավոր է՝ իր բիզնեսներն ամեն գնով պահելու համար։ Ըստ շրջանառվող լուրերի՝ Կարեն Դարբինյանի բիզնեսներն անգամ Հայաստանի սահմաններից դուրս են:

NEWSPRESS.am-ի տեղեկություններով՝ Կարեն Դարբինյանը Վրաստանից ֆուռով ներկրում է մեծ քանակությամբ Range Rover մակնիշի մեքենաներ՝ թարմացնելով իր  հարազատների ավտոպարկը: Հետաքրքիր է՝ այդ մեքենաներից բաժին հասնելո՞ւ է ռուս միլիարդատեր բիզնեսմենի կնոջը՝ Տատյանային, որը հաճախ է լինում Հայաստանում: 

Բացի այդ, որոշ աղբյուրների համաձայն, ՀԷՑ-ի Կարեն Դարբինյանին են պատկանում «Բիգ էներգո», «Ֆուլ հաուզ», «էներուօրքս քորփորեյշնս», «Մարֆրիկ», «Սագամար», «Բալիս», «Սթար լայն» ՍՊ ընկերությունները:

Այս բոլոր ընկերությունները զբաղված են էլեկտրական ցանցերի համար շինարարական պատվերներ կատարելով: Չենք քննարկում, թե ինչ պայմաններով և ինչ գներով․․․

Ինչպես նաև չենք քննարկում, թե որքան գումար է դուրս գրում պայմանագրով, ու որքան գումար է տալիս Կարեն Դարբինյանն իր որդուն՝ Հայկ Դարբինյանին, նրան պատկանող ընկերության ավտոբուսներով ՀԷՑ-ի աշխատակիցներին աշխատանքի տանելու համար։

Կարեն Դարբինյանը հոգ է տարել նաև իր մյուս որդու՝ Արա Դարբինյանի մասին։ Վերջինս ՀԷՑ-ում պետի պաշտոն է զբաղեցնում․․․

Այլ կերպ ասած՝ ՀԷՑ-ը նաև Դարբինյանների «ընտանեկան բիզնեսն է»։

Այս ընտանիքից Կարենի կինը՝ Լուսինե Ղասաբօղլյանը, ևս տնօրեն է աշխատում, ավելի կոնկրետ՝ Երևանի թիվ 51 դպրոցի տնօրենն է։

Հատկանշական է, որ նա տնօրենի պաշտոնում պատահական չի հայտնվել։

Որոշ տեղեկություններով՝ այդ հարցում նրան օգնել է ՀԷՑ-ի պաշտոնյա ամուսինը, ով ջերմ հարաբերությունների մեջ է իշխանության հետ։

2018 թվականի հոկտեմբերին էլ նախկին տնօրենի աշխատանքից ազատվելուց հետո, թափուր պաշտոնի մրցույթին 6 այլ թեկնածուների հետ առաջադրվեց նաև Լուսինե Ղասաբօղլյանը։

Մեր տեղեկություններով՝ մրցույթում նրա «հաղթանակը» կանխորոշված էր։ Ըստ որոշ տեղեկությունների՝ այդ կանխորոշվածությունը նույնիսկ վրդովվեցրել է ծնողական խորհրդին ու որոշ ուսուցիչների, ովքեր ցանկացել են կանխել դա․․․ 

Արդյունքում, այսօր Լուսինե Ղասաբօղլյանը տնօրեն է և ամեն օր գնում է դպրոց՝ իր թանկարժեք հագուստով ու աքսեսուարներով, որոնց գներն իհարկե չի տեղավորվում նրա համեստ աշխատավարձի մեջ․․․

Նշենք նաև, որ Դարբինյանները մեծ հողատարածք ունեն Ծաղկաձորում:

Թերևս այս հրապարակմամբ բավարարվենք այսքանով։ Նոր տեղեկություններ և «գաղտնիքների բացահայտում» կլինի հաջորդիվ․․․

Շարունակելի...