Զինծառայողներից թալանված գումարը, չինովնիկների պարգևավճարներն ու Սեյրան Օհանյանի լռության գինը (լուսանկար, տեսանյութեր)

Արդեն տևական ժամանակ է, ինչ բարձրաձայնվում է այն մասին, որ ՀՀ զինծառայողների և պետական մի շարք մարմինների աշխատակիցների ամենամյա արձակուրդի համար վճարումը ճիշտ չի հաշվարկվում։

Ստացվում է՝ պետությունը թալանում է զինծառայողներին: Մասնավորապես նշվում է 150 միլիոն դոլարին համարժեք` ՀՀ դրամի պարտքի մասին:

Խնդիրը տարիների ընթացքում է ձևավորվել ու, այս մասին էլ զինծառայողները վաղուց են բարձրաձայնում: Նրանք նշել են, թե օրենսգրքի որ հոդվածներն են խախտվել ու ինչ սխալ հաշվարկների մասին է խոսքը...

ՀՀ պահեստազորի զինծառայողների նախաձեռնությունը ի դեմս պահեստազորի մայոր՝ Էդգար Հովհաննիսյանի և մայոր՝ Ցոլակ Խաչատրյանի, ով 2020թ. սեպտեմբերյան 44-օրյա պատերազմի ժամանակ կամավորագրվեց և հերոսաբար զոհվեց Ջաբրայիլում, բազմիցս հանդես են եկել հայտարարություններով՝ ՀՀ զինծառայողների և նրանց հավասարեցված անձանց իրավունքների խախտումների կապակցությամբ և կոչ արել նաև կազմակերպել բաց hանրային լսումներ՝ խնդրին համակարգային լուծում տալու նպատակով:

Ցավով պետք է նկատել, որ Ցոլակ Խաչատրյանի նման շատերն այսօր արդեն մեզ հետ չեն, իսկ խնդիրը մինչ օրս կա ու մնում է անհաղորդ... համենայն դեպս՝ պահեստազորի զինծառայողներին դեռևս չի վերադարձվել թալանված գումարը...

Վերոնշյալ իրավախախտումների մասով 2018 թ. ՀՀ ՄԻՊ-ը և 2021թ. ՀՀ Հանրային խորհուրդը տվել են իրենց եզրակացությունն ու հաստատել, որ իրականում, այո՛, տեղի են ունեցել խախտումներ.. և միայն այդքանը:

Հարցը քննարկվել է նաև Պաշտպանության, Ազգային անվտանգության, Ներքին գործերի հարցերի հանձնաժողովի նիստում:

Հարկ է նկատել, որ հարցի քննարկման ժամանակ, Հանրային խորհրդի նախագահ Ստյոպա Սաֆարյանը, բացման ելույթով հանդես գալուց հետո, հարցի քննարկման ժամանակ, դուրս է եկել սենյակից... և, հավանաբար դրանով էլ, հարցը համարել փակված՝ թերևս չցանկանալով «վատամարդ» դառնալ իր «տիրոջ» համար...

Ինչևէ... 

Այս հարցի շուրջ, ինչպես հարկն է՝ օրենքով ու կարգով, մեկ տարի առաջ էլ, Պահեստազորի զինցառայողների նախաձեռնությունը դիմել է խորհրդարանական իշխող ուժին՝ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանին, ինչպես նաև ընդդիմությանը (մասնավորապես «Հայաստան» խմբակցության ղեկավար Սեյրան Օհանյանին) ու ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանին: 

Պատգամավորներից խնդրին անդրադարձել է «Պատիվ ունեմ» խմբակցությունից  Տիգրան Աբրահամյանը, իսկ անկախ պատգամավոր Թագուհի Թովմասյանը հարցի շուրջ քննարկում է կազմակերպել...

Ինչ վերաբերվում է Հայկ Կոնջոյանին, ապա նա կցկտուր «երկտող» է ուղարկել՝ ի պատասխան պահեստազորային զինծառայողների ներկայացրած դիմումի: Նա հավատացրել է, թե դիմումը ուղարկել է Պաշտպանության նախարարություն: 

Սակայն, հաշվի առնելով այն հանգամանքը, որ ՊՆ-ից այդպես էլ արձագանք չի ստացվել, կարելի է եզրակացնել, որ կա՛մ Կոնջոյանի «թափը չի ներել» հարց լուծել, կա՛մ նա պարզապես խաբում է, կա՛մ էլ՝ նախարարությունը ձեռքերը լվացել է իր ծառայողներից...

Ամեն դեպքում հարցը շարունակվում է մնալ չլուծված...

Ինչ վերաբերվում է Սեյրան Օհանյանին և Անդրանիկ Քոչարյանին, ապա նրանցից ոչ մեկը, ոչ մի ձևաչափով չի արձագանքել...

NEWSPRESS.am-ի տեղեկություններով՝ Սեյրան Օհանյանն այս հարցով, ներքին կարգով, դիմել է գերատեսչություն, և ստանալով իրավազուրկ պատասխաններ, ինչպես ասում են, մատը մատին չի տվել անգամ գոնե որպես զինվորական տեր կանգնելու զինծառայողների խնդրին` վերհանելով հարցը և վերականգնելով նրանց իրավունքները...

Այնպես որ, Սեյրան Օհանյանն այս առումով հետ չի մնում իշխանությունը ներկայացնող խորհրդարանական ուժի իր գործընկերներից, որոնց համար կարևորն իրենց շահն է ու աթոռը...

Օհանյանի դեպքում՝ թանկ է իր ունեցվածքը ու ձեռքից գնացող տունը...

Խնդիրը մի քիչ այլ է Անդրանիկ Քոչարյանի դեպքում...

Հիշեցնենք, որ այս անձնավորությունը 2019թ. հունվարի 18-ին ընտրվեց ՀՀ ԱԺ պաշտպանության և անվտանգության հարցերի մշտական հանձնաժողովի նախագահ և, իբրև ձեռնամուխ եղավ «նախկինների մեղքերը» բացահայտելուն ու նրանց պատասխանատվության բերելու գործին...

Չգիտես ինչու, նա ինքն իրեն նախկին չի համարում... երևի պատճառն այն է, որ նախկինում նրան շրջապատած մարդիկ մահացել են, իսկ ողջերը՝ կամ «համրացել են», կամ էլ «կորցրել հիշողությունը»՝ «շառ ու փորձանքից հեռու» սկզբունքով...

«Ազատությանը» տված իր հարցազրույցներից մեկում իրեն ուղղված հարցին, թե՝ ինչպես վստահել ձեզ, Քոչարյանն ինքնավստահ արձագանքեց՝ «Նայեք մեր դեմքին, մեզ շրջապատող մարդկանց ու վստահեք մեզ»...

Սա իհարկե ծիծաղելի կիներ, եթե իրականությունն այդքան ողբալի չլիներ։ 

Հիշեցնենք իրենց հիշողությունը բոլոր կորցրածներին, որ Քոչարյան Անդոն նախկիններից ամենանախկինն է ու նախկին օդիոզ կերպարներից ամենակարկառունը... Ու եթե նախկին չեկիստը որոշեր արդար բացահայտումներ անել, ապա պետք է սկսեր հենց իրենից... իսկ դա պե՞տք է իրեն...իհարկե ո՛չ... Այնպես որ, նա ոչ թե բացում, այլ փակում է իր տակ եղած «կեղտը»...

Ինչպես նաև պետք չէ նրան, իր կլորիկ աշխատավարձից ու նույնքան կլորիկ պարգևավճարից պոկել ու վճարել զինծառայողներից թալանած գումարը...

Ու փողոցից Աժ «ամբարում» հայտնված պատգամավորները, անկուշտի նման շարունակում են լցնել իրենց գրպաները՝ մոռանալով, որ եկել էին «թալան» վերադարձնելու, ոչ թե նոր թալանով զբաղվելու...

Ինչ վերաբերվում է պահեստազորային զինծառայողներից թալանված գումարներին, ապա վերջիններս հարցը դատական կարգով բողոքարկվել է...

Արդարությունը վերականգնելու և կոռուպցիայի դեմ պայքարելու խոստումով իշխանության եկած Փաշինյան Նիկոլի ձեռքը ոչ միայն չի գնում պետբյուջե, որպեսզի վերադարձնի զինծառայողների գումարները, այլև նա այդ թալանը կոռուպցիա չի էլ համարում...

Ու չինովնիկները շարունակում են պարգևավճարներ ստանալ նաև այն գումարների հաշվին, որը թալանել են սպաներից. այն սպաներից, ովքեր սահման են պահում և ում շնորհիվ իշխանության անկուշտ անդամները պահում են իրենց ոչինչ չարժեցող գոյությունը:

Արմինե Մկրտումյան