«Ավտոյիդ մոտ կանգնած եմ, քեզ մորթելու եմ»․ դանակով զինված տղամարդը սպառնացել է Արիանա Հովսեփյանին (տեսանյութ)

NEWSPRESS.am-ի հիմնադիր-տնօրեն Արիանա (Արմենուհի) Հովսեփյանի նկատմամբ հերթական մահափորձն է կատարվել։ Նրա խոսքով՝ սեպտեմբերի 13-ին՝ ուշ երեկոյան, նրան զանգահարել է ոմն մեկը, ով սպառնացել է, թե դանակով զինված՝ եկել է սպանելու իրեն։ Սկզբում Արիանա Հովսեփյանն այս զանգին այնքան էլ լուրջ չի վերաբերվել և անջատել է հեռախոսը։ Սակայն զանգը նորից է եկել:

«Սպառնալիքներով ու հայհոյանքով, անծանոթն ասաց՝ ավտոյիդ մոտ կանգնած եմ, քեզ մորթելու եմ»,- Mediahub.am-ի հետ զրույցում պատմում է Արիանա Հովսեփյանն ու հավելում, որ արագ զանգահարել է ոստիկանություն, որտեղից արագ արձագանքել են։

Երբ ոստիկանները եկել են, տղամարդը փախուստի է դիմել։ 

Արիանա Հովսեփյանը նկատում է, որ սա իր նկատմամբ հերթական մահափորձն էր, որոնց պատճառն իր սուր քննադատություններն են։ Սակայն, եթե նախկինում ոստիկանները «չեն բացահայտել» հանցագործությունը և մեղավորներին «չեն գտել», ապա այս դեպքում այլընտրանք չունեն, հատկապես որ մեքենայի տեսախցիկը հստակ ֆիքսել է սպառնացող «տղամարդուն»։

Տեղեկություններ կան, որ տվյալ անձը Նիկոլ Փաշինյանի աջակիցներից է, կամ, ինչպես Արիանա Հովսեփյանը նշեց՝ «Նիկոլի տասովշիկը»։

Ամեն դեպքում, լրատվական կայքի հիմնադիրը մտադիր չէ ընկրկել և պատրաստ է հասնել նրան, որ մեղավորն անպայման ստանա իր պատիժը։

Մանրամասները՝ Mediahub.am-ի տեսանյութում